गोरखा – गण्डकी प्रदेशसभाका सांसद प्रकाशचन्द्र दवाडीले आफ्नो तलब भत्ता सामाजिक काममा लगाएका छन् । सांसद दवाडीले चालु आर्थिक वर्षमा आफ्नो तलब भत्ताबाट ९ लाख रुपैयाँ सामाजिक काममा लगाएका हुन् । प्रदेशसभा सदस्यको सपथ लिएकै दिन दवाडीले सेवा सुविधावापत पाउने रकम आफ्नो परिवारका लागि उपयोग नगर्ने, सामाजिक काममा लगाउने घोषणा गरेका थिए ।
निर्वाचित भएको वर्ष १२ लाख, पछिल्लो वर्ष १० लाख रुपैयाँ सामाजिक काममा लगाएका उनले २०७६ पुसदेखि २०७७ पुससम्म ९ लाख रुपैयाँ विभिन्न संघ संस्था तथा व्यक्तिलाई सहयोग गरेको जानकारी दिएका छन् । बुधबार जिल्ला सरमुकाममा पत्रकार सम्मेलन गर्दै उहाँले उक्त कुराको सार्वजानिक गर्नु भएको हो ।
आफ्नो सेवा सुविधामा पाएको रकममा व्यक्तिगत रकम थप गरेर सहयोग गर्दै आएको दवाडीले बताए । उनले आफूले निर्वाचन क्षेत्रका नागरिकको स्वास्थ्य उपचार, विकास निर्माण, शिक्षा र कृषिजस्ता विषयमा सहयोग केन्द्रित गरेको बताए । गोरखा क्षेत्र नम्बर २ ‘ख’ बाट निर्वाचित सांसद दवाडी हाल गण्डकी प्रदेशसभामा नेपाली कांग्रेस संसदीय दलको प्रवक्ता छन् ।
तस्बिर माेहिसन अलिमियाँ
