गोरखा – गोरखा जिल्लामा पहिलो चरणमा कोरोना बिरुद्व खोप लगाउने १ हजार ५९० जनाको नाम स्वास्थ्य मन्त्रालयमा पठाईएको छ ।
जिल्लामा पहिलो चरणमा स्वास्थ्य कर्मी, स्वयंम सेविका, शव व्यवस्थापनमा खटिने व्यक्ति, एम्बुलेन्स चालक र शव बहानचालकको नाम मन्त्रालय पठाइएको हो ।
स्वास्थ्य कार्यालय मार्फत जिल्ला भित्रका ११ वटै स्थानीय तहमा कार्यरतहरुका नामावली संकलन गरेर पठाइएको हो । विवरण पठाइएको मध्ये गोरखा नगरपालिकामा सवै भन्दा धेरैको नामावली संकलन भएको छ । गोरखा नगरपालिकाका पहिलो चरणमा २५३ जनाले कोरोना बिरुद्व खोप पाउने भएका हुन् ।
त्यस्तै गरी पालुङटार नगरपालिकाका २११ जना, सिरानचोक गाउँपालिकाका १३४ जना, शहिद लखन गाउँपालिकाका ११३, गण्डकी गाउँपालिकाका १२७ जनाको नाम प्राप्त भएको स्वास्थ्य कार्यालयले जनाएको छ ।
जिल्लाको वारपाक सुलिकोट गाउँपालिकाका १२६ जना, अजिरकोट गाउँपालिकाका १०५ जना, भिमसेन थापा गाउँपालिकाका १०८, धार्चे गाउँपालिकाको १०५, चुमनुब्री गाउँपालिकाका ११९ जना र आरुघाट गाऊँपालिकाका १३८ को नाम सहित मन्त्रालयमा पठाइएको स्वास्थ्य कार्यालय गोरखाका कोरोना फोकल पर्सन नारायण अर्यालले बताए ।
सरकारले यही माघ १४ अर्थात बुधबारबाट पहिलो चरणको कोरोना भाइरसविरुद्धको खोप अभियान सुरु गर्न लागेको छ ।
