गोरखा – गण्डकी प्रदेशका मुख्यमन्त्री पृथ्वीसुब्बा गुरुङले प्रदेश सरकार माथि अबिश्वासको प्रस्ताव पेश भए आफुले सामना गर्ने बताए ।
शनिबार गोरखा सदरमुकामा भएको नेपाल कम्युनिष्ट पार्टी (नेकपा) ओली समूहको अगुवा कार्यकर्ता भेला तथा प्रशिक्षणमा सहभागी हुन आइपुगेका गुरुङले पत्रकारहरु कुराकानी गर्दै यस्तो बताएका हुन् ।
गुरुङले केन्द्रमा जे जस्तो भएतापनि प्रदेश भित्र सरकार सञ्चालनमा मिलेर जानु पर्ने पक्षमा आफु रहेको भन्दै अबिश्वासको प्रस्ताव नै आए सामना गर्नुको बिकल्प नरहेको बताए । ‘अबिश्वासको प्रस्ताव पेश गर्न अर्को पक्षलाई अफट्यारो भइरहेकाले अहिलेसम्म दर्ता भएको छैन’ मुख्यमन्त्री गुरुङले भने । उनले ‘कुनै पनि बेला अबिश्वासको प्रस्ताव आउनसक्छ तर त्यसका लागि आफु सामना गर्न तयार भएको’ बताए ।
गुरुङले नेकपा दाहाल–नेपाल समुहलाई केन्द्रमा विवाद भएपनि प्रदेशमा मिलेर जान आग्रह गरिरहेको बताए । साविकको माओबादी र नेकपा एमाले अलग अलग भएर नै सरकार बनाएको भन्दै अरुलाई उदाहरण देखाउन पनि अहिले त्यसलाई कायम राख्न आफुले आग्रह गर्ने गरेको गुरुङको भनाई थियो ।
पार्टी भित्रको झगडा पनि बिर्सिएर चुनाव जित्नका लागि एकिकृत भएर लड्नुको विकल्प छैन भन्दै गुरुङले चुनाव भनेको बिग्रिएको पाटीलाई सच्चाउने, एकताबद्ध भएर लाने एउटा अभियान पनि हो तर त्यसमा अहिलेसम्म कसैको पनि ध्यान नगएको समेत उनले बताए ।
