काठमाण्डौं – राप्रपाले यो बर्ष गोरखामा भब्य रुपमा पृथ्वी जयन्ती तथा राष्ट्रिय एकता दिवस मनाउने भएको छ ।
राप्रपाले दशैभरी पृथ्वी जयन्ती मनाउने भएता पनि यो बर्ष अध्यक्ष कमला थापा आफै उपस्थित हुने भए पछि कार्यक्रम भब्य रुपमा मनाउने तयारी थालेको हो ।
गोरखामा हुने कार्यक्रममा अध्यक्ष थापा सहभागी हुने राप्रपाका नेता मोहन श्रेष्ठले जानकारी दिए । थापा गोरखामा हुने र्यालीमा सहभागी भइ पृथ्वीनारायण शाहको सालिकमा माल्यार्पण र सम्बोधन गर्ने कार्यक्रम तय भएको नेता श्रेष्ठले बताए ।
राष्ट्र निर्माता पृथ्वीनारायण शाहको सम्मान र सम्झनमा हुने कार्यक्रममा सर्व साधारणहरु स्वस्फूर्त रुपमा सहभागी हुने अपेक्षा राप्रपाले राखेको छ ।
सोही दिन अध्यक्ष थापाले राप्रपा जिल्ला कार्यालयमा हुने पार्टीको झण्डोत्तोलन र चुनाव चिन्ह हलोको अनावरण गर्ने तथा पार्टीका अगुवा कार्यकर्ताको सम्बोधन गर्ने कार्यक्रम रहेको राप्रपा गोरखाले जनाएको छ ।
पृथ्वी जयन्ती तथा राष्ट्रिय एकता दिवस अवसरमा काठमाण्डौंमा हुने चियापान कोरोना महामारीको कारण रद्व गरिएको छ । राप्रपाले २०६५ देखि हरेक वर्ष सामाजिक जीवनका विभिन्न व्यक्तिलाई निमन्त्रणा गरि चियापान गर्दै आएको थियो ।
