काठमाडौं– हास्य अभिनेता किरण केसीलाई दर्शकहरुले ‘ए राता मकै’ उपनामले समेत चिन्दछन् । चलचित्र निर्माताको रुपमा समेत स्थापित यी अभिनेता विभिन्न प्रस्तुतीमार्फत दर्शकहरुलाई हसाउँन त सिपालु छन् नै, सामाजिक सञ्जालमा गम्भिर प्रकृतिका स्टाटसहरुमार्फत समाजलाई झक्झक्याउने कार्य पनि गरिरहेका हुन्छन् । कोरोना भाइरसको महामारीपछि जारी लकडाउनमा राहत वितरणमा समेत सक्रिय भएका कलाकार केसीले आज बुधवार एउटा घतलाग्दो स्टाटस लेखेका छन् । ‘ए राता मकै…यो आँखाले के-के देख्यो, के-के देखेन’ शीर्षकको स्टाटसको अन्त्यमा कलाकार केसीले एउटा जिज्ञासा समेत राखेका छन् ।
कलाकार केसीले लेखेको स्टाटस जस्ताको तस्तै :
‘जनआन्दोलनमा दुबै पक्षको गरी १७ हजार जनाले ज्यान गुमाएको पनि देख्यो,
२०५८ सालको दरबार हत्याकाण्ड पनि देख्यो,
२०६२-६३ मा जन आन्दोलन भयो, राजतन्त्रको अन्त्य भएको पनि देख्यो,
२०६४ सालमा संविधान सभाको पटक-पटक समय थपेर २०७० सालमा नयाँ संविधान घोषणा गरेको पनि देख्यो,
२२ घण्टासम्म लोडसेडिड जनताले खेपेको र लोडसेडिङ हटेको पनि देख्यो,
२०७२ सालमा ९ महिना नाकाबन्दी भएको पनि देख्यो,
फेरी २०७२ सालमा बिनाशकारी भूकम्प गएको पनि देख्यो,
२०७४ सालमा बामपंथीको बहुमतको सरकार पनि देख्यो,
२०७६ सालमा विश्वमा नै विध्वंशकारी महामारीको रूपमा फैलिएको कोरोना भाईरसले लाखौंको ज्यान लिएको पनि देख्यो ।
२०७७ सालमा नेपाल सरकारले नयाँ रजनैतिक नक्सा निकालेको पनि देख्यो,
तर, ३३ किलो सुनकाण्ड, वाईडबडि प्रकरण, बालुवाटार जग्गा प्रकरण, ७० करोड काण्ड, सांसद अपहरण काण्ड, एनसेल काण्ड, औषधि खरीद प्रकरण, भुपू प्रहरी आईपि, डिआईजी र सभामुख अनि सांसाद जेल गएको पनि देख्यो, यो धेरै भन्दा धेरै काण्डको कारवाही भाको चाहिँ देखिन बा ! मलाई मात्र यस्तो भा’को हो की, तपाईंहरूलाई पनि ?
