गोरखा समाचारदाता
काठमाण्डौं – हिजो (मंगलबार) एकै दिन नेपालमा ८३ जनामा कोरोना भाइरस संक्रमित भटिएका छन् ।
मंगलबार दिउँसो ५७ जना र साँझ पुनः २६ जनामा कोरोना संक्रमण पोजेटिभ देखिएको हो ।
योसँगै नेपालमा कोरोनाभाइरस संक्रमितको संख्या २१७ पुगेको छ । राजधानीमा गरिएको परीक्षणमा मंगलबार साँझ २६ जनामा कोरोनाभाइरस संक्रमण देखिएको स्वास्थ्य मन्त्रालयले जनाएको छ ।
संक्रमित भेटिएका मध्ये ३ जना भक्तपुर र काठमाडौँका रहेका छन् । काठमाडौंकी ३३ वर्षीया महिला, भक्तपुरका २५ वर्षीया महिला र २७ वर्षीय पुरुषमा संक्रमण देखिएको हो । पर्सामा १२ पुरुष र ६ महिला गरी थप १८ जनामा संक्रमण पुष्टि भएको छ ।
त्यस्तै महोत्तरीमा २ पुरुष, धनुषामा २० वर्षीय महिला र ४० वर्षीय पुरुष, सर्लाहीमा ४५ वर्षीय पुरुषमा संक्रमण देखिएको छ ।
यसअघि मंगलबार नै प्रयोगशालामा ५७ जनामा संक्रमण पुष्टि भएको थियो । तीमध्ये पर्साका ३९, कपिलवस्तुका ८, रुपन्देहीका ९ र बाराका १ जना रहेका थिए ।
