गोरखा समाचारदाता
काठमाण्डौं – आगामी आर्थिक वर्षका लागि सरकारले ल्याउने बजेट र नीति तथा कार्यक्रमका बारेमा आजदेखि संसदमा प्रि–बजेट बारे छलफल शुरु हुँदै छ ।
अर्थमन्त्री डाक्टर युवराज खतिवडाले संघीय संसदको दुवै सदनमा छलफलका लागि प्रस्ताव पेश गर्ने कार्यसूची बनेको छ । मन्त्री खतिवडाले बैठकमा आर्थिक वर्ष २०७७/०७८ का लागि विनियोजित विधेयकका सिद्धान्त र प्राथमिकता कर प्रस्ताव बाहेक पेश गर्नेछन् । त्यसमा सांसदहरुले आ–आफ्ना धारणा राख्ने कार्यसूचि छ । प्रि बजेट छलफलका लागि संसदमा ३ दिनको समय तय गरिएको छ ।
दुवै सदनले बजेटका सिद्धान्त र प्राथमिकताबारे अर्थमन्त्री खतिवडालाई सुझाव दिनेछन् । संघीय संसदका सुझाव समेट्दै अर्थमन्त्रीले नीति तथा कार्यक्रम ल्याउने छन् ।
नीति तथा कार्यक्रम जेठ २ गते राष्ट्रपति विद्यादेवी भण्डारीले सार्वजनिक गर्ने कार्यक्रम तय गरिएको छ । उक्त नीति तथा कार्यक्रमको आधारमा नयाँ बजेट सार्वजनिक हुनेछ ।
जेठ १५ गते बजेट ल्याउनु पर्ने संवैधानिक वाध्यात्मक प्रावधान छ । यो बर्षको बजेट कोरोना संक्रमणका कारण अर्थतन्त्रमा परेको प्रभाव न्यूनिकरणमा केन्द्रित हुने अनुमान गरिएको छ ।
