कोरोना भाइरस (कोभिड १९) को संक्रमण फैलिन नदिन सरकारले हिजो मंगलवारबाट थप ८ दिनका लागि सिंगो देश ‘लकडाउन’ गर्ने घोषणा गरेको छ । यो समयमा अत्यावश्यक कामबाहेक घरभन्दा बाहिर निस्कन नपाइने भएका कारण वर्षभरी फिल्म वा म्यूजिक भिडियोको छायांकनका लागि राजधानी बाहिर हुने कलाकारहरु अहिले घरको चारकुनामा खुम्चिएर बस्न बाध्य छन् ।
प्रेम जोडी सौगात मल्ल र सृष्टि श्रेष्ठ पनि गएको १० दिनदेखि घरमै सीमित भएका छन् । केही दिनअघि एक भिडियो सन्देशमार्फत् उनीहरुले कोरोनाबाट बच्नका लागि विशेष सावधानी अपनाउन दर्शकलाई आग्रह गरेका थिए । अहिले एउटै घरको छतमुनी बस्दै आएका उनीहरु अर्को वर्ष विवाह गर्ने तयारीमा छन् । परिवारले समेत यी दुईलाई विवाहका लागि मन्जुरी दिइसकेको छ ।
विगत डेढ वर्षदेखि एकअर्कालाई डेट गरिरहेका सौगात र सृष्टिले ‘लकडाउन’ हुनुभन्दा अगाडि फिल्म ‘माइकल अधिकारी’ को छायांकन भ्याएका थिए । यो फिल्मपछि उनीहरु मधुसुदन भट्टराईले निर्देशन गर्ने फिल्म ‘सँगसँगै’ मा व्यस्त हुँदै थिए । तर, कोरोनाको त्रासले यो फिल्म पछाडि धकेलिएको छ । त्यसैले अहिले उनीहरु घरमै बसेर एकअर्कासँग प्रेम साटिरहेका छन् ।
सौगात मल्ल सामाजिक सञ्जालबाट टाढा भए पनि सृष्टि भने निकै सक्रिय हुन्छिन् । उनी दैनिक विभिन्न तस्विर तथा भिडियोहरु पोस्ट गरिरहेकी हुन्छिन् । यसबीच, उनले बुधवार सौगातसँगको प्रेमिल तस्विर शेयर गर्दै ‘लभ लकडाउन’ भनेर लेखेकी छन् । तस्विरमा सौगातले सृष्टिको गालामा चुम्बन गरेका छन् । ‘लकडाउन’ को समयमा उनीहरु एकअर्काप्रति समर्पित देखिएका छन् ।
