कैलासबावु श्रेष्ठ
गोरखा – बेलायतको रश्मोर बरो काउन्सिल र गोरखाको गोरखा नगरपालिका बीचमा भगिनी सम्बन्ध कायम भएको छ ।
बेलायतस्थित नेपाली दूतावासको पहल र स्थानीय काउन्सिलसंगको सहकार्यमा गोरखा नगरपालिकाको मेयर राजनराज पन्त र रश्मोर काउन्सिलका मेयर सु कार्टरद्वारा रसमोर काउन्सिल भवनमा सम्झौतापत्रमा हस्ताक्षर भएको हो ।
सम्झौतापत्रमा सांस्कृतिक, प्रजातान्त्रिक, प्राविधिक र शैक्षिक अवसरहरु एकअर्काबीच आदानप्रदान गर्ने सहमति भएको उल्लेख गरीएको छ । यसैगरि दुवै निकायबीचमा भ्रमण, सामाजिक आर्थिक विकासमा हातेमालो, संयुक्त अनुसन्धान, विभिन्न परियोजना सञ्चालन, भौतिक पूर्वाधार निर्माण र सुशासनमा समेत सहयोग गर्दै अघि बढ्ने उल्लेख गरिएको छ ।
सम्झौता भएको भोली पल्ट खुशियालीमा लन्डनस्थित नेपाली दूतावासले एक विशेष कार्यक्रमको आयोजना गरेको थियो । कार्यक्रममा रश्मुर बरोका काउन्सिलर डेभिड क्लिफोर्ड, गोर्खा नगरपालिकाका मेयर राजनराज पन्त, उप मेयर फ्र्यांक रोस्ट लगायतका स्वदेशी एवं विदेशी विभिन्न व्यक्तिहरुको उपस्थिति रहेको थियो ।
कार्यक्रममा बेलायतका लागी नेपाली राजदूत दुर्गाबहादुर सुवेदीले दुवै मेयरलाई बधाई दिँदै यो सम्बन्धले दुवै पक्षबीच सांस्कृतिक, पर्यटन, शिक्षा तथा व्यापारका क्षेत्रमा थप सहयोग पुग्ने आशा व्यक्त गरे । राजदूत सुवेदीले नेपाल देश गरिब भएपनि प्रकृति र संस्कृति जस्ता कुरामा विश्वकै धनी देश भएको भन्दै नेपाल पर्वतारोहण, ट्रेकिङ लगायत पर्यटनका लागि उत्कृष्ट गन्तव्य भएकाले नेपाल भ्रमण गर्न सबैलाई आग्रह गरेका थिए ।
कार्यक्रममा गोर्खा नगरपालिकाका मेयर राजनराज पन्तले भगिनी सम्बन्धबारे प्रष्ट पार्दै नेपाल भ्रमण वर्ष २०२० को अभियानलाई सफल पार्न आफूहरुले शुरु गरेको ‘गोर्खा भिजिट’ को बारेमा जानकारी गराएका थिए । पन्तले भगिनी सम्बन्धले नगर क्षेत्रको आर्थिक, भौतिक, साँस्कृतिक तथा सामाजिक विकासमा टेवा पुग्नुका साथै नेपाल भ्रमण वर्ष २०२० लाई सफल पार्न समेत थप सहयोग पुग्ने विश्वास ब्यक्त गरे । भ्रमणको लागि गोर्खा अत्यन्त रमणीय भएकोले एकपटक गोर्खा घुम्नको लागि सबैमा अनुरोध गरेका थिए ।
कार्यक्रममा गोरखा नगरपालिकाका प्रमुख प्रशासकीय अधिकृत कृष्णकुमारी श्रेष्ठले गोरखा जिल्लाको भौगोलिक, सांस्कृतिक, धार्मिक, ऐतिहासिक तथा पर्यटकीय सौन्दर्यबारे वृत्तचित्र प्रस्तुत पार्दै गोरखामा क्रिश्चियनहरुको चर्च र मुस्लिमहरुको मस्जिद समेत रहेको जानकारी गराएकी थिइन् ।
बेलायतको रश्मोर बरो काउन्सिलमा अहिले सम्मकै धेरै नेपालीहरुको बसोवास रहेको स्थान हो ।
