गोरखा समाचारदाता
पोखरा – ‘एशियन टुर’ प्याराग्लाइडिङ वर्ल्डकप पोखरामा हुने निश्चित भएको छ ।
आगामी फागुन ११ देखी १७ अर्थात (ब्रुअरी २३ देखी २९) गतेसम्म पोखरामा प्याराग्लाइडिङ वर्ल्ड कप एशियन टुर तथा १९औँ नेपाल ओपन प्याराग्लाइडिङ च्याम्पियनशीप हुने भएको हो ।
नेपाल हवाई खेलकूद संस्था (ना) र नेपाल प्याराग्लाइडिङ तथा ह्याण्डग्लाइडिङ संघको आयोजना तथा प्याराग्लाइडिङको अन्तर्राष्ट्रिय छाता संस्था फेडेरेशन एरोनेटिक इन्टरनेशनल (एफएआइ)को सहकार्यमा ३० देशका १२५ जना सहभागी हुने आयोजकले जनाएको छ ।
एशियाका प्याराग्लाइडिङ खेलाडीलाई विश्वकपको सुपर फाइनलसम्म प्रवेशका लागि सन् २०२० मा ३ वटा टुर आयोजना गर्ने योजना अनुसार पोखरामा पहिलो टुर हुन लागेको नेपाल हवाई खेलकुद संस्थाले जानकारी दिएको छ ।
बाँकी २ वटा टुर भने मागका आधारमा एशियाका अन्य २ देशमा गरिने छ । हाल विश्वकपमा एशियाली खेलाडीको संख्या कम भइरहेको अवस्थामा यस टुरले उनीहरुको संख्या बढाउन मद्दत पुग्ने विश्वास लिईएको छ।
‘पोइन्ट’ र ‘र्याङकिङ’का आधारमा एशियामा हुने ३ वटा टुरबाट शीर्ष स्थानमा रहने ५ देखि ८ जनासम्म खेलाडीले सन् २०२१ मा हुने विश्वकपको सुपर फाइनलमा प्रवेश पाउने छ । सुपर फाइनलमा पुग्ने खेलाडीको सङ्ख्या भने वल्र्डकप कमिटीले तय गर्ने छ ।
अहिले खेलाडीको अनलाइन दर्ता भई भई रहेको छ ।
‘क्रसकन्ट्री’ विधामा प्रतिस्पर्धा हुने हुँदा तोकिएको स्थानभन्दा केही परसम्म खेलाडी जानुपर्ने भएकाले सुरक्षा संवेदनशीलतालाई हेरेर प्रतियोगितास्थल वरपर जहाज वा हेलिकप्टरको उडान रोक्नका लागि समेत प्राधिकरणसँग आग्रह गरिएको नाले जनाएको छ ।
प्रतियोगिताबाट साहसिक खेल प्याराग्लाइडिङको माध्यमबाट राष्ट्रिय तथा अन्तर्राष्ट्रिय क्षेत्रमा नेपालको प्रवर्द्धन हुने भएकाले भ्रमण वर्ष २०२० लाई सफल बनाउन सहयोग पुग्ने विश्वास समेत लिइएको छ ।
