गोरखा समाचारदाता
गोरखा – प्राथामिक शिक्षकमा स्थायी भएका गोरखा नगरपालिका क्षेत्रका ३५ शिक्षकको पदस्थापना भएको छ ।
बिहिबार गोरखा नगरपालिकाले कार्यालयमा एक कार्यक्रमको आयोजना गरी पदस्थापना भएको पत्र थमाएको हो । नगरभित्रका १९ विद्यालयमा सो संख्याका शिक्षकहरु शुक्रबारदेखि हाजिर हुने बताइएको छ । स्थायीमा नाम निकाल्न सफल ३३ महिला र २ पुरुष मध्ये ३ जना अपाङ्ग रहेको नगर शिक्षा शाखाले जनाएको छ ।
शिक्षा विभागको मानव संसाधन कार्यविधीका आधारमा विद्यालय छनौट गरी शिक्षक खटाइएको शाखाका प्रमुख बाबुराम बरालले बताए । जसमध्ये पहिलो प्राथमिकतामा अपाङ्ग परेका छन् । उनिहरुले आफुले रोजेको विद्यालयमा पठाइएको छ । ३ अपाङ्ग भएका शिक्षकहरुले छहरेको बालमन्दिर मावि, महेन्द्र मावि कुन्दुरटार र देवीटारको नवज्योती प्रावि रोजेका छन् ।
त्यस्तै यसअघिदेखि करारमा पठनपाठन गराइ आएकाहरुलाई समेत सोही विद्यालयमा नियुक्ती दिइएको छ । यसैगरी महिला, स्थानीय बासिन्दा लगायतका आधारमा समेत उनिहरुलाई प्राथमिकता दिएर खटाइएको बरालले बताए ।
कार्यक्रममा नगरप्रमुख राजनराज पन्तले आधुनिक प्रबिधिको भरपुर उपयोग गरी पठनपाठन गराउन निर्देशन दिए । ‘अहिलेको युग प्रबिधिको युग हो, यसको भरपुर उपयोग गर्नुस’ पन्तले निर्देशन दिए ‘कुनै दलको कार्यकर्ता भएर भन्दा पनि स्वतन्त्र रुपमा विद्यार्थी र स्कुलको भविश्य हेरेर शिक्षा दिनुस ।’
गोरखा नगरपालिकालाई शैक्षिक हव बनाउने उदेश्य रहेको जानकारी दिदै उनले सरकारले सामुदायिक विद्यालयमा गरेको लगानीलाई सार्थक तुल्यानुपर्नेमा जोड दिए । कार्यक्रममा सामाजिक विकास समितिका संयोजक एवं वडा नम्बर २ का वडाध्यक्ष रहमतुल्ला मियाँले सिप र दक्षता प्रदर्शन गर्न शिक्षकहरुलाई आग्रह गरे ।