गोरखा समाचारदाता
गोरखा – भूकम्पले भत्काएका प्रहरी चौकी पुर्ननिर्माण हुने क्रमजारी छ ।
जिल्ला प्रहरी कार्यालय गोरखाले निर्माण सम्पन्न भएका भवनहरु उद्घाटन गरी अस्थायी टहरामा रहेका प्रहरीहरुलाई नयाँ भवनमा स्थानान्तरण गरिरहेको छ । सोही अनुरुप सोमबार चनौटे अस्थायी प्रहरी पोष्ट र बालुवा प्रहरी चौकीको उद्घाटन गरिएको छ ।
एक कार्यक्रमका वीच गण्डकी प्रदेशका प्रहरी प्रमुख डिआइजी बिनोद शर्मा घिमिरेले दुबै प्रहरी चौकी उद्घाटन गरेका हुन् । सो अबसरमा बोल्दै उनले समयानुसार प्रहरी जन शक्ति दक्ष र प्रबिधि मैत्री बन्दै गएको बताएका छन् । ‘पहिले हिजो आज जस्तो अपराध हुँदैन थियो, भाडाका घरमा बसेर पनि प्रहरीले काम गर्न सक्थ्यो’ उनले भने ‘अहिलेको विज्ञान र प्रवधिको युगमा प्रहरी पनि फेरिएको छ । प्रहरी संगठनलाई थप व्यवसायिक बनाउन हामीले पूर्वाधार बिकासमा जोड दिइरहेका छौं ।’
प्रहरीलाई दक्ष बनाउनका लागि गण्डकी प्रदेश सरकारले महत्वपूर्ण सहयोग गरेको उनले बताए । प्रहरीले स्थानीयतहसँगको साझेदारीमा समुदाय प्रहरी कार्यक्रम सञ्चालन गरी सुरक्षा व्यवस्था मजबुद बनाएको उनको भनाई छ ।
चनौटे अस्थायी प्रहरी पोष्ट १ करोड ५८ लाख र बालुवा प्रहरी चौकी १ करोड ३६ लाख ४८ हजारमा निर्माण भएको हो । तीभवनहरुमा सुबिधा सम्पन्न कार्यालय, थुनुवा कक्ष, आवास, मेस, बैठक कक्ष लगायतका कोठाहरु निर्माण गरिएको छ ।
बारपाक प्रहरी चौकी
कार्यक्रममा अजिरकोट गाउँपालिकाकी उपाध्यक्ष चन्द्रमायाँ गुरुङले नागरिकको चाहना अनुसार कामगर्न प्रहरीलाई आग्रह गरेकी थिइन । गोरखाका २२ प्रहरी चौकी मध्ये १३ वटा पुर्ननिर्माण सम्पन्न भएका छन् । केही दिन अघि इलाका प्रहरी हर्मी र रातमाटे प्रहरी चौकी भवन पनि उद्घाटन गरिएको थियो ।
मंगलबार बारपाक प्रहरी चौकीको नवनिर्मित भवन उद्घाट गर्ने कार्यक्रम छ । अझै पनि केही प्रहरी चौकी पुर्ननिर्माण नहुँदा अस्थायी टहरामा टेण्डमा सेवा दिन बाध्य छन् ।
