गोरखा समाचारदाता
गोरखा – असाहाय वृद्धवृद्धालाई लक्षित छेवेटारमा वृद्धा आश्रम बन्ने भएको छ । ४ करोड ६८ लाख ४० हजार १७१ लागतमा निर्माण गर्न लागिएको सुबिधा सम्पन्न वृद्धा आश्रम भवनको आइतबार शिलन्यास गरिएको छ ।
वडा अध्यक्ष देबिबहादुर बस्नेतको अध्यक्षतामा आयोजित एक कार्यक्रमका वीच गण्डकी प्रदेशका भौतिक पूर्वाधार बिकास मन्त्री रामशरण बस्नेत र गोरखा नगरपालिकाका प्रमुख राजनराज पन्तले भवन शिलन्यास गरेको हुन् ।
३२ जना क्षमताको उक्त आश्रममा वृद्धवृद्धाका लागि आवास भवन, कार्यालय भवन, चौकीद्धार कक्ष लगायतका पूर्वाधार बनाइने शहरी आवास तथा भवन डिभिजनका प्रमुख सुरेश खनालले जानकारी दिए ।
कार्यक्रम बोल्दै मन्त्री बस्नेतले जनताले अनुभूती गर्ने गरि बिकास निर्माणका काम अघि बढेको दाबी गरेका छन् । ‘अब कुनै बाहानामा विकासको काम रोकिदैन, बल्ल जनताले बिकास कस्तो हुँदो रहेछ भनेर अनुभूती गर्न पाएका छन्,’ गण्डकी प्रदेश सरकारका प्रवक्ता समेत रहेका उनले भने ‘यसले हामीलाई निकै उत्साहित बनाएको छ, बिकास निर्माणको कामलाई कसरी तिब्र बनाउन सकिन्छ भनेर हामी लागिरहेका छौं ।’
केन्द्र, प्रदेश र स्थानीय तहको आपसी समझादारीमा पूर्वाधार विकास थुप्रै योजनाहरु अघि बढाइएकाले बर्तमान सरकारको काम प्रति जनता पनि उत्साहित उनको दाबी छ । ‘कहाँ के कुराको आवश्यकता छ, जनताले के चाहनुभएको छ, त्यअी योजनामा बजेट बिनियोजन भएको छ’ उनले भने ‘यहाँ जेष्ठ नागरिकका लागि आश्रम माग गर्नुभयो हामीले भवन निर्माणको काम सुरु गरेका छौं, सडक मागेका ठाउँमा सडक बन्दैछन्, खानेपानी र सिंचाइ आवश्यक भएको ठाउँ सोही अनुसारको काम भएको छ ।
गाउँगाउँमा सडक, विद्युत, खानेपानी, सिंचाईका पूर्वाधार पुग्न थालेको भन्दै मन्त्री बस्नेतले अब उत्पादनमा जोड दिन सर्वसाधरणलाई आग्रह गरेका छन । कार्यक्रम बोल्दै गोरखा नगरपालिका प्रमुख राजनराज पन्तले तोकिएको समयमा भवन निर्माण सम्पन्न गर्न आग्रह गरेका छन । आशिष/इको जेभीले कम्पनीले निर्माणको इजाजत पाएको उक्त भवन २०७८ साउन ३१ गते निर्माण सम्पन्न गर्ने लक्ष्य लिएको छ ।
आइतबार नै उनले ताकुकोटमा आयोजित न्वागी मेलाको उद्घाटन समेत गरेका छन् । गृह जिल्ला गोरखा आएका मन्त्री बस्नेतले सोमबार प्रदेश सरकारको लगानीमा कालोपत्र हुन लागेका ३ सडकको शिलन्यास गर्ने कार्यक्रम छ ।