गोरखा समाचारदाता
गोरखा – गोरखाको लाप्राक गुप्सीपाखामा बन्दै गरेको एकिकृत नमुना वस्ती हस्तान्तरणमा ढिलाई हुने भएको छ ।
गैर आवासिय नेपाली संघ एनआएएनएले घर निर्माणमा चासो नदिए पछि लाभग्राहीहरुलाई घर हस्तान्तरण गर्ने प्रक्रियामा ढिलाई हुने भएको हो ।
लाभग्राही छनौट गरी उनीहरुलाई जग्गाको लालपूर्जा सहित घर हस्तान्तरणको अन्तिम चरणको काम शुरु भएता पनि घर निर्माण संगै शौचालय, बिद्यालय, स्वास्थ्य चौकी, ब्यापारीक मल र खुल्ला मैदान निर्माण नभएका कारण ढिलाई हुने भएको हो ।
गएको कात्तिक २४ गतेसम्ममा वास्तविक लाभग्राही छनौट गरिसक्ने भनिएपनि हाल सम्म पनि त्यो काम हुन सकेको छैन । ५७३ लाभग्राहीका लागि घर निर्माणको काम अन्तिम चरणमा पुगेको भएता पनि अहिले ४९ लाभग्राही थप भए पछि अन्यौल्यता थपिएको छ ।
अन्तिम लाभग्राही छनौटको काम धार्चे गाऊँपालिका आफैले गर्ने छ । उत्त कामका लागि वडा नम्बर ४ का वडाध्यक्ष राज गुरुङलाई जिम्मेवारी दिईएको छ । कात्तिक १७ गते बसेको बैठकले समिति गठन गरि १ साताभित्र अन्तिम लाभग्राही छनौट गर्ने निर्णय गरेको थियो ।
स्ती निर्माण शुरु गर्दा भन्दा अहिले लाभग्राहीको संख्या ४९ घर परिवार लाभग्राही थपिएको वडाध्यक्ष गुरुङले बताए ।
अन्यत्र घरजग्गा नभएकालाई मात्रै अब लाभग्राहीको सूचीमा राखिने छ । वास्तविक लाभग्राही यंकिन भईसकेपछि उनीहरुको नाममा लालपूर्जा बनाउने काम शुरु हुने पुनःनिर्माण प्राधिकरण अन्तर्गतको अनुदान ब्यवस्थापन तथा स्थानीय पूर्वाधार इकाई गोरखाका प्रमुख रामशरण आचार्यले बताए ।
लालपूर्जा हस्तान्तरणका लागि जग्गा कित्ताकाटको काम अन्तिम चरणमा पुगिसकेको छ । ब्यक्तिगत सहित स्वास्थ्य चौकी, विद्यालयको जग्गाको पनि कित्ताकाटको काम भैरहेको छ । हरेक लाभग्राहीले ३ आना १ पैसा १ दाम जग्गाको लालपूर्जा पाउने छन् । लालपूर्जा पाएपनि उनीहरुले १० वर्षसम्म घरजग्गा बिक्री गर्न भने पाउने छैनन् ।
परिवारमा स्वत हस्तान्तरण हुने बाहेक घरजग्गा बिक्री गर्न नपाइने इकाईले जानकारी दिएको छ । गुप्सीपाखाको १८ दशमलव ३२ हेक्टर क्षेत्रफल जग्गामा लाप्राकका भूकम्प पीडितहरुका लागि घर निर्माणको काम भईरहेको छ ।
अहिले घरको शौचालय निर्माणका लागि लाप्राकी जनाले श्रमदान गरी रहेको छ । बस्तीमा आवश्यक काठ आउना साथ घरको माथिल्लो तल्लामा काठ राख्ने काम हुने छ ।
घर निर्माण बाहेक वस्ती आसपासको बाटो, सिंढी र नाला निर्माण लगायतको काम धार्चे गाऊँपालिका आफैले गर्ने छ । त्यसको ब्ययभार गैरआवासीय नेपाली संघले नै ब्यहोर्ने गरी गाउँपालिका संग लिखित सम्झौता भई सकेको छ ।
संघका नयाँ अध्यक्ष कुमार पन्तले घर निर्माण तत्कालै पुरा गरी नेपाल सरकारलाई हस्तान्तरण तयारी भई रहेको जानकारी दिए ।