गोरखा समाचारदाता
गोरखा – आरुघाट गाउँपालिकाले दुग्ध व्यवसायलाई प्रर्वद्वन गर्ने नीति लिएको छ ।
पशुपालनलाई जोड दिदै दुध र मासुमा गाउँपालिकालाई आत्मनिर्भर बनाउन विभिन्न कार्यक्रम अघि बढाइएको छन ।
सोही अनुरुप किसानलाई अनुदानमा उन्नत जातको भैसी र व्याड राँगो वितरण गरिएको छ । ‘युवालाई विदेशिन जानबाट रोक्दै गाउँमै रोजगारीको अवसर सिर्जना गर्नुपर्छ भनेर हामी लागि परेका छौं’ अध्यक्ष पूर्णबहादुर दाहालले भने ‘पशुपालनमा व्यवासायिकता ल्याउँदै दुध र मासु बाहिरबाट ल्याउन नपर्ने स्थितीमा पुरयाउने लक्ष्य हो ।’ पुश सेवा शाखाको वार्षिक कार्यक्रम अन्र्तगत ५० प्रतिशत अनुदानमा ९ वटा भैसी र ७५ प्रतिशत अनुदानमा २ वटा व्याड राँगो वितरण गरिएको छ ।
शनिवार एक कार्यक्रमका वीच अध्यक्ष दाहालले छनोटमा परेका किसानलाई अनुदानको भैसी र राँगो वितरण गरेका हुन् । पशु सेवा शाखाको वार्षिक कार्यक्रम अन्र्तगत पहिलो चौमासिक कार्यक्रमको लागि स्वीकृत भएको ७ लाख र किसानले संकलन गरेको ६ लाख गरी १३ लाख रुपैयाँमा ९ वटा दुहुनो भैसी र २ वटा व्याड राँगो खरिद गरी किसानलाई वितरण गरिएको पशु सेवा शाखाका प्रमुख इन्द्रहरी खनालले जानकारी दिए ।
पहिलो पटक उन्नत जातको भैसी र रागो वितरण गरिएको भन्दै गाउँपालिका अध्यक्ष दाहालले कार्यक्रमको प्रभावकारिता हेरेर व्यवासायीक पशुपालन गर्न चाहने किसानलाई गाउँपालिकाले आवश्यक सहयोग गर्ने आस्वासन समेत दिएका छन् ।
भौगोलिक अवस्थिती र हावापानीलाई ख्याल गरी उपर्युक्त जातको छनोट गरेर उन्नत जातका पशु चौपाया पालनमा लाग्न उनले कृषकहरुलाई आग्रह गरेका छन । ‘आरुघाट बजारमा दुधको ठूलो माग छ, सो अनुरुप छिट्टै यहाँ डेरी पनि खुल्दैछ’ उनले भने ‘अब युवाहरु विदेश जाने होइन यहीँ सम्भावना छ आउनुहोस् हामी अवसर सिर्जना गर्छौं ।’ परिक्षणको रुपमा चालु आर्थिक वर्षमा ९ वटा भैसी र २ वटा राँगो वितरण गरिए पनि प्रभावकारीता अध्ययन गरि आगामी आर्थिक वर्षमा पनि यो कार्यक्रमलाई निरन्तरता दिने गाउँपालिकाले योजना बनाएको छ ।
कार्यक्रममा वडा नम्बर १० का अध्यक्ष मेनबहादुर अधिकारी, आर्थिक विकास समिति संयोजक सन्तबहादुर नेपाली, पशु शाखा प्रमुख इन्द्रहरी खनाल लगायतले मन्तव्य राखेका थिए ।