गोरखा समाचारदाता
गोरखा – गोरखा जिल्ला ६ हजार बढी भूकम्प पिडीतले दोस्रो किस्ता नपाउने भएका छन ।
राष्ट्रिय पुनःनिर्माण प्राधिकरणले जेठ मसान्त भन्दा पहिलेनै लाभग्राही सूचीमा परेकाहरुलाई कात्तिक मसान्त सम्ममा दोस्रो किस्ताको अनुदान रकम लिइसक्न भनेको भनेता पनि नलिएका ६ हजार बढीले अब दोस्रो किस्ता नपाउने भएका हुन ।
प्राधिकरणले अर्को निर्णय नगरे ति भूकम्प पिडितहरुले दोस्रो किस्ताको अनुदान रकम नपाउने राष्ट्रिय पुनःनिर्माण प्राधिकरण अनुदान ब्यवस्थापन तथा स्थानीय पूर्वाधार इकाई गोरखाले जानकारी दिएको हो ।
प्राधिकरणले जेठ मसान्तभन्दा पहिलेनै लाभग्राही सूचीमा परेकाहरुलाई कात्तिक मसान्तसम्ममा दोस्रो किस्ताको अनुदान रकम लिइसक्न भनेको थियो । तोकिएको समयभित्र दोस्रो किस्ताको रकम नलिनेलाई अनुदान रकम नदिने प्राधिकरणले निर्णय गरेको थियो ।
त्यस्तो निर्णमा फेरबल नभएमा गोरखा जिल्लाका ६ हजार ३६० लाभग्राहीले दोस्रो र तेस्रो किस्ताको अनुदान रकम नपाउने निश्चित छ । जिल्लामा हालसम्म लाभग्राहीको संख्या ७१ हजार १७६ पुगेको छ । त्यसमध्ये ६७ हजार १६८ ले अनुदान सम्झौता गरि पहिलो किस्ताको अनुदान रकम लिएका छन् भने ६० हजार ८०८ ले दोस्रो किस्ताको अनुदान रकम लिएको छ ।
जेठ मसान्तभन्दा पछि लाभग्राही सूचीमा परेकाहरु सहित गुनासोबाट थप भएका लाभग्राही, जोखिम क्षेत्रका लाभग्राही, भूमीहीन लाभग्राही, सार्वजनिक जग्गामा घर बनाउन अनुमति पाएका लाभग्राही, पुनरावेदन समितिबाट कायम भएका लाभग्राही र प्रवलीकरण गर्नुपर्ने लाभग्राहीले भने अगामी असार मसान्तसम्मै अनुदान रकम पाउनेछन् ।
पुनःनिर्माण प्राधिकरणले गत असोज २९ गते गरेको निर्णय अनुसार यस्ता लाभग्राहीले २०७७ असार मसान्तभित्र तेस्रो किस्ताको अनुदान लिइसक्ने कबुलियतनामा गरेपछि क्रमैसँग किस्ता रकम पाउनेछन् ।
प्राधिकरणले कात्र्तिक २७ गते अर्को निर्णय गर्दै विशेष कारणवश अनुदान सम्झौता हुन नसकेका लाभग्राही पनि कात्तिक मसान्तभित्र दोस्रो किस्ता लिन वाध्य नहुने भनेको छ । कुन कारणले अनुदान समझौता गर्न नसकेका हुन् भनेर सम्बन्धित स्थानीय तहबाट मनासिव कारण सहितको सिफारिस बनाउनु पर्ने प्राधिकरणले जनाएको छ ।
यस्ता लाभग्राहीको विवरण मंसीर मसान्तभित्र पठाइसक्नु पर्ने अनुदान ब्यवस्थापन तथा स्थानीय पूर्वाधार इकाई गोरखाले जानकारी दिएको छ । जिल्लामा हालसम्म ५५ हजार ९३२ लाभग्राहीले घर निर्माण पूरा गरि तेस्रो किस्ताको अनुदान रकम लिएका छन् ।
दोस्रो किस्ता लिएर तेस्रो नलिनेको संख्या ४ हजार ८७६ रहेको छ । उनीहरुले पनि माघ मसान्तसम्ममा तेस्रो किस्ताको रकम लिइसक्नु पर्ने प्राधिकरणले जनाएको छ ।