गोरखा समाचारदाता
गोरखा – इन्टरनेशनल काउन्सिल अफ म्युजियम नेपालका प्रमुख विजयकुमार शाहीले नेपालमा संग्रहालय सञ्चालन सम्बन्धी स्पष्ट कानूनको अभाव रहेको बताए ।
विश्वभरका संग्रालयहरुको छाता संस्था इन्टरनेशनल काउन्सिल अफ म्युजियम आइकमकका पदाधिकारीहरु समेतको सहभागितामा गोरखा संग्रहालय भएको गोष्ठीको निष्कर्ष सुनाउदै प्रमुख शाहीले त्यस्तो कुरा बताएका हुन ।
आइकमका पदाधिकारीहरु सहित विज्ञहरुविच संघिय राजधानी काठमाण्डौंमा ३ दिनसम्म चलेको गोष्ठीमा विश्वभरका संग्रहालय सञ्चालन कसरी भैरहेको छ भन्नेबारे छलफल पछि शुक्रकार गोरखा संग्रहालय परिसरमा गोष्ठीको निष्कर्ष सुनाउँदै प्रमुख शाहीले नेपालमा संग्रहालय सञ्चालन सम्बन्धी स्पष्ट कानूनको अभावमा पुरातत्व विभागदेखि गैरसरकारी संस्था र नीजि कम्पनीहरुले समेत संग्रहालय सञ्चालन गरिरहेको भन्दै उनले उनीहरु कुन विधिलाई आधार बनाएर चलेका छन् भन्नेबारे स्पष्ट नभएको बताए ।
विश्वका अरु सबै देशका संग्रहालयलाई कुनै न कुनै कानूनले बाँधेको भएपनि नेपालमा भने स्पष्ट कानून नभएको शाहीले बताए । कानूनी रिक्तता लगायतका कमजोरीलाई टेकेर जथाभावी संग्रहालय खुल्ने क्रम बढ्दै गए यसको गरीमा कमजोर बन्ने समेत शाहीले ठोकुवा गरे ।
गोष्ठी समापनका अवसरमा बोल्दै इन्टरनेशनल काउन्सिल अफ म्युजियम फ्रान्सका उपाध्यक्ष अल्बर्टो गिलोन्देनीले संसारभरको संग्रहालयको गरीमा कायम राखीराख्न विभिन्न खालका चुनौती देखिएको बताए । इन्टरनेशनल काउन्सिल अफ म्युजियम फ्रान्सकी एरिना जेमोले संग्रहालय संरक्षणमा सहकार्यका लागि राजनीतिक दलहरुलाई समेत आग्रह गरीन ।
कार्यक्रममा सहभागि भएका प्रतिनिधिसभाका साँसद हरिराज अधिकारीले अन्तर्राष्ट्रिय अभ्यासहरुबाट सिक्दै नेपालको अनुकुलता हुने गरि संग्रहालय सम्बन्धी एकिकृत कानून र नीति बनाउनु पर्ने बताए । त्यसका लागि संसदको आगामी हिउँदे अधिवेशनमा आफुले छलफल अघि बढाउने बचन दिए ।
कार्यक्रममा वनस्पती विज्ञ प्रोफेसर डा.धर्मराज डंगोलले गोरखा संग्रहालयमा एक साता स्वय म्सेवकको रुपमा काम गर्ने बताए ।
नेपालमा प्राचीन स्मारक संरक्षण ऐन २०१३ बाहेक पुरातात्विक सम्पदा र संग्रहालयबारे अरु कानूनको अभाव रहेको इन्टरनेशनल काउन्सिल अफ म्युजियमका सदस्य एवम् गोरखा संग्रहालयका प्रमुख नवराज अधिकारीले बताए ।
गोष्ठीमा विश्वभरका संग्रालयहरुको छाता संस्था इन्टरनेशनल काउन्सिल अफ म्युजियम आइकमकले नेपालमा संग्रहालयबारे तत्कालै स्पष्ट कानून बनाउन सुझाव दिएको छ ।