गोरखा समाचारदाता
गोरखा – राष्ट्रिय सभाका विपक्षी दलका नेता साँसद सुरेन्द्रराज पाण्डेले गोरखा र धादिङ्गको सिमानामा निर्माण हुने बुढी गण्डकी आयोजनाको काम लावारिस र गतिहिन अवस्थामा भएको भन्दै आलोचना गरे ।
बुढी गण्डकी जलाशययुक्त जलविद्युत आयोजनाको डुबानमा पर्ने गोरखा आरुघाट बजार र आर्खेत धादिङ्गको विशालनगर खहरेको उचित मुआब्जा तुरुन्त निर्धारण गरी वितरण गर्न दिवाव दिने उद्वेश्यका साथ आयोजित जनप्रतिनिधीहरु एवं सरोकार समितिको प्रतिनिधीहरुले बिहीबार जिल्ला प्रशासन कार्यालय गोरखाका दिएको धर्ना कार्यक्रमलाई संबोधन गर्दै साँसदपाण्डेले उत्त कुरा बताएको हो ।
पाण्डेले राष्ट्रिय गौरबको आयोजना, समग्र मुलुककै आर्थिक क्षेत्रमा कायापलट गर्न सक्ने संभावित आयोजनालाई लावारिस तालले गतिहिन अवस्थामा पुग्नु भनेको प्रोजेक्टको आयोजनाको भविष्य माथि नै प्रश्न चिन्ह खडा गरेको भन्दै आक्रोश समेत ब्यत्त गरेका थिए ।
धर्ना स्थलबाट नै उर्जा मन्त्री बर्षमान पुनलाई डा.भट्टराई र साँसद पाण्डेले फोनमा कुराकानी गरेका थिए । कुराकानीका क्रममा मुआब्जा निर्धारण गर्ने जिम्मा प्रमुख जिल्ला अधिकारीलाई भएको भन्दै मन्त्री पुन पन्छीएको डा.भट्टराई र साँसद पाण्डेले बताए ।
बिहान १० बजे देखी १२ बजे सम्म दिईएको धर्नामा पूर्व प्रधानमन्त्री डा.बावुराम भट्टराई समेतको सहभागिता रहेको थियो । जिल्लाको बिकास आयोजना सम्बन्धी समिक्षा कार्यक्रममा सहभागि हुन आएका डा.भट्टराईले धर्ना कार्यक्रममा केही बेर सहभागी भएर निस्कीएका थिए ।
लामो समय सम्म पनि उत्त क्षेत्रको मुआब्जा निर्धारणमा दुवै जिल्ला प्रशासन कार्यालयले वेवास्ता गरेको भन्दै सरोकार समितिले चरणबद्व आन्दोलनको कार्यक्रम सार्वजनिक गरेको छ । जस अनुसार उचित र छिटो मुआब्जा निर्धारण गर्न कात्र्तिक २५ गते सम्म दिएको म्याद सकिए पछि दोस्रो पटक मंसिर २ गते सम्म समय सिमा तोकिदिएको थियो । त्यस पछि पनि मुआब्जा नतोकिएको भन्दै सरोकार समितिले सम्बन्धीत गाउँपालिकाका स्थानिय प्रतिनिधी, प्रदेश साँसद र संघिय साँसदहरुलाई लिएर प्रशासनमा धर्ना दिएको हो ।
कार्यक्रम अनुसार भोली (शुक्रबार) जिल्ला प्रशासन कार्यालय धादिङ्गमा र ९ गते बुढी गण्डकी आयोजनाको कार्यालय सिउरेनी टारमा धर्ना दिने कार्यक्रम रहेको छ ।
धर्ना कार्यक्रममा सहभागी दुवै गाउँपालिकाका अध्यक्षले छिटो र उचित मुआब्जाको लागि साँकेतिक धर्ना कार्यक्रम गरीएको बताए ।
यता प्रमुख जिल्ला अधिकारी देवेन्द्र लामिछानेले भने आफु एक्लैले मुआब्जा निर्धारण गर्न नसक्ने भन्दै यसका लागि प्रभावित क्षेत्रका बासिन्दा, स्थानिय जनप्रतिनिधी, राजनैतिक दल, प्रदेश साँसद र संघिय साँसदहरुले सहयोग गनुपर्ने धारणा ब्यक्त गरे ।
धर्ना कार्यक्रममा गोरखा जिल्लाबाट प्रदेशस सदस्य प्रकाशचन्द्र दवाडी र धनमाया लामा पोख्रेल, गोरखाको आरुघाट र धादिङ्गको त्रिपुरासुन्दरी गाउँपालिकाका प्रमुख, उपप्रमुख र वडाध्यक्ष तथा सरोकार समितिका प्रतिनिधीहरुको समेत समभागिता रहेको थियो ।
