कैलासबावु श्रेष्ठ
गोरखा – लाप्राकको गुप्सीपाखामा निर्माण गरिएको एकिृकत नमूना बस्ती बनाउन नेपाली सेनाले ८ करोड रुपैयाँ भन्दा बढिको श्रमदान गरेको छ ।
गैर आवासिय नेपाली संघ एनआरएनले निर्माण गरेको उक्त बस्ती निर्माणमा सेना २०७६ असार मसान्त सम्ममा ८ करोड २८ लाख ८९ हजार ८९५ रुपैयाँ बरावरको श्रमदान गरेको नेपाली सेनाका रणसिहं दल गण गोरखाका गणपती उज्जल केसीले जानकारी दिए । ‘यो बस्ती निमार्ण सम्पन्नहुनुमा नेपाली सेनाको कन्ट्रिव्युसन पनि ठूलो छ’ उनले भने ‘हामीले दक्ष र अर्धदक्ष जनशक्तिहरुले वस्ती निर्माण सम्पन्न गरेका हौं ।’ उक्त बस्ती निर्माणमा नेपाली सेनाको तर्फबाट दक्ष र अर्धदक्ष गरि कुल १ लाख १७ हजार ६२५ खेताला प्रयोग भएको उनले बताए ।
ती मध्ये दक्ष कामदारले ५२ हजार ८१५ दिन र अर्धदक्ष कामदारले ६४ हजार ८१० दिन बरावरको काम गरेको नेपाली सेनाले बताएको छ ।
२०७३ माघ १५ गतेबाट नेपाली सेनाका जनशक्तिहरुले भवन निर्माण सुरु गरेका थिए ।
सुरुमा एक वर्ष भित्रकाम सम्पन्न गर्ने गरी नेपाली सेनासँग सम्झौता भएपनि बस्ती निर्माण नसकिएपछि २ पटक म्याद थपभएको थियो । पछिल्लो पटक थपिएको म्याद सकिएकोले नेपाली सेनाले यही मंसिर २९ गते लाप्राक छोड्ने तयारी गरेको छ ।
घर निर्माणको काम सकिएपनि सेनाले छोडेपछि अन्यपूर्वाधार निर्माणको काम के हुने भन्ने अन्यौलता सर्बसाधारणमा छ । ‘कामअझै बाँकी छ तर सेनाले छोड्ने भन्ने सुनेका छौं’ वडाध्यक्ष राज गुरुङ्ग भने ‘अरु कामहुने छाँट देखिएन ।’ सेनाका १७० जना जनशक्तिहरुले घरको जग खन्ने, ढुङ्गा लाउने, डिपीसी, गारो तथा प्लाविङ र वल्डीङ, रंग लगाउने, छाना छाउने र सामान्य लेबरको काम समेत गरेको थियो । सो विचमा सामाग्री ढुवानी गर्ने सवारी साधन समेत सेनाले नै सञ्चालनगर्दै आएको थियो ।
भूकम्प पछि पहिरोकाकारण पुरै गाउँ स्थानान्तरण गर्नुपर्ने भएपछि लाप्राकका सबै स्थानीयका लागि गुप्सीपाखामा घर बनाइएको हो । ५७३ घर निर्माण भएपछि अझै ४९ घर छुटेका छन् । तीमध्ये कतिपयको नाम लाभग्राहीको सूचीमा समेत छैन् ।