गोरखा समाचारदाता
काठमाण्डौं – सरकारी स्तरबाट देशै भरीका विद्यालयमा छात्राहरुलाई स्यानेटरी प्याड उपलब्ध गराउने योजना छायाँमा परेको छ ।
सरकारले मङ्सिर १ बाट निःशुल्क रूपमा सेनेटरी प्याड व्यवस्थापन सम्बन्धी कार्यविधि स्वीकृत हुन नसक्दा विद्यालयमा अध्ययनरत छात्राका लागि स्यानेटरी प्याड वितरण हुन सकेको छैन । देशभरिका सामुदायिक विद्यालयका कक्षा ६ देखि १२ सम्मका छात्रालाई निःशुल्क रूपमा प्याड उपलब्ध गराउने योजना सरकारले बनाएको थियो ।
शिक्षा, विज्ञान तथा प्रविधि मन्त्रालयका अनुसार सो कार्यविधि मन्त्रिपरिषद्को सामाजिक समितिमा छलफलका लागि पुगी सकेकाले स्वीकृत भएलगत्तै वितरण प्रक्रिया अगाडि बढाईने छ ।
कार्यविधि स्वीकृत भएपछि आवश्यक रकम स्थानीय तहलाई उपलब्ध गराइने छ । स्थानीय तहले प्याड खरिदका लागि टेन्डर आब्हान गर्ने र त्यस पछि मात्र विद्यालयमा पठाईने भएका कारण छात्राको पहुँचमा निःशुल्क प्याड पुग्न अझै केही महिना लाग्ने छ ।
प्राय विद्यालयहरुमा कक्षा ६ अध्ययन गर्ने उमेरका छात्राको महिनावारी सुरु हुने एक अध्ययनले देखाएको छ । सोही अनुसार नेपाल सरकारले कक्षा ६ देखि कक्षा १२ सम्म निःशुल्क प्याड उपलब्ध गराउने योजना बनाइएको हो । सो तहका करिब १४ लाख ३७ हजार छात्रा सामुदायिक विद्यालयमा अध्ययन गरिरहेका छन् ।