नरेन्द्र ढकाल्
गोरखा – जिल्ला ट्राफिक प्रहरी कार्यालयले पहिलो चौमासिकको प्रगती प्रतिवेदन सार्वजानिक गरेको छ ।
आइतबार पत्रकार भेटघाट गर्दै ट्राफिक हालसम्म भए गरेका काम बारे जानकारी गराएको हो । ट्राफिकले यो अवधीमा ३ हजार ५ सय ५० सवारी साधनलाई कारवाही गरेको छ । श्रावण देखि कार्तिकसम्म ती सवारी साधन कारवाहीमा पर्दा २८ लाख २९ हजार ५ सय रुपैयाँ राजस्व संकलन भएको छ । गत आर्थिक वर्ष २०७५/७६ मा ३४ हजार ५० सवारी साधन कारवाहीमा पर्दा २१ लाख ७४ हजार ५०० राजस्व संकलन भएको थियो ।
यो गत वर्ष भन्दा ६ लाख ५५ हजारले बढि हो । यो आर्थिक वर्षमा ५ सय भन्द बढि सवारी साधन कारवाहीमा परेको जिल्ला ट्राफिक प्रहरी कार्यालय गोरखाका प्रमुख सुकबहादुर बिकले जानकारी दिए । ‘हामीले चेकजाँच र सचेतनामुलक कार्यक्रमलाई एक साथ अघि बढाएका छौं’ उनले भने ‘जसले गर्दा विगतको तुलनामा दुर्घटनाको दर घटेर गएको छ भने सवारी नियम उलंघन गर्नेहरु कारवाहीको दायरामा आएका छन ।’
गत वर्षको तुलनामा चालु आर्थिक वर्षको पहिलो चौमासिकमा दुर्घटना भने घटको छ । आर्थिक वर्ष २०७५/०७६ मा १० वटा सवारी साधान दुर्घटना हुँदा ३ जनाको मृत्यु हुनुका साथै १२ जना गम्भीर र ८ जना सामान्य गरी २० जना घाइते भएका थिए ।
चालु आर्थिक वर्षको पहिलो चौमासिकमा ४ वटा मात्र दुर्घटना भएको छ । सवारी दुर्घटनाबाट १ जनाको मृत्यु हुँदा २ जना गम्भीर ४ सामान्य गरी ६ जना घाइते भएका छन् । ट्राफिक प्रहरीको सक्रियता बढेका कारण दुर्घटनाको दर घट्नुको साथै राजस्व बढि संकलन भएको प्रमुख बिकले बताए । यो विचमा ३५ स्थानका ३ हजार ६ सय ६७ जना सर्वसाधारणलाई दुर्घटना न्यूनीकरण र सवारी व्यवस्थापनको बारेमा जानकारी गराइएको छ । कार्यक्रममा ३ वर्ष यताको प्रगती प्रतिवदेनको समिक्षा समेत गरिएको थियो ।
‘हामीले ठाउँठाउँमा सचेतनमूलक कार्यक्रम गरिरहेका छौं यसलाई अझै बढाउँदै लैजाने योजना छ’ ट्राफिक प्रमुख बिकले भने ‘अहिले मोटरसाइकलमा घुमुवा टोली पनि परिचालन गरिएको छ, चेक जाँच पनि उत्तिकै जोड दिइरहेका छौं ।’ ग्रामिण क्षेत्रमा बिस्तार भएको सडक र ग्रामिणबजारहरुमा पनि सवारी चाप बढिरहेकाले ट्राफिक प्रहरीको थप जनशक्ति माग गरिएको उनले बताए ।
यसैविच जिल्ला ट्राफिक प्रहरी कार्यालयले अब हरेक महिना एउटा चालकलाई सम्मान गर्ने भएको छ । नियमको पालना गरी सवारी चलाउने उत्कृष्ट चालक छनोट गरी हरेक महिना सम्मान गर्न लागिएको ट्राफिक प्रमुख बिकको भनाई छ ।