गोरखा समाचारदाता
गोरखा – गोरखा सदरमुकामको १२ किलो बजारमा शुक्रबार बिहान अचम्मको दृष्य देखियो । अरु बेला कारवाहीका लागि सवारी रोकेर जरिवाना गर्ने नेपाल प्रहरी र ट्राफिक प्रहरीले जिल्लामा पहिलो पटक सवारी चालकलाई फुलको गुच्छा र खादा लगाएर सम्मान गरी रहेको थियो ।
जिल्ला प्रहरी कार्यालय गोरखा र सामुदायिक सेवा केन्द्र गोरखाले समुदाय–प्रहरी साझेदारी कार्यक्रम अन्तरर्गत जिल्लामा पहिलो पटक सवारी चालकहरुलाई सम्मान गर्ने उद्वेश्यका साथ सवारी चालकलाई फुलको गुच्छा र खादा लगाई दिएको हो ।
जिल्लामा पहिलो पटक भएको कार्यक्रम अब भने प्रत्येक महिनाको १ दिन सवारी चालकलाई सम्मान गर्ने गरी कार्यक्रम तय गरीएको जिल्ला प्रहरी कार्यालय गोरखाले जानकारी दिएको छ ।
उत्तरी गोरखाका साथै गोरखा बजार पछि सवारीका हिसाबले अत्यन्तै ब्यस्त रहने उत्त क्षेत्र भएर जिल्ला भित्रने र जिल्ला बाहिर जाने सबै सवारी चालकलाई फुलको गुच्छा र खादा लगादिईएको थियो ।
उत्त मार्ग भएर चल्ने सवारी चालकलाई सवारी अनुमती पत्र भए नभएको, सवारीको कागजात दुरुस्त भएको नभएको र सवारीको अवस्था राम्रो भए नभएको बारे जानकारी लिदै सम्मान गरीएको थियो ।
जिल्ला प्रहरी कार्यालय गोरखाका प्रहरी उपरिक्षक ओमप्रसाद शर्माले जिल्ला बाट बाहिरीने यात्रुबाहक बसका सवारी चालकलाई खादा र फुलको गुच्छा दिएर सम्मान कार्यक्रमको सुरुवात गरेका थिए ।
चालकलाई सम्मान गनुपूर्व भएको एक कार्यक्रममा बोल्दै प्रहरी उपरिक्षक शर्माले यस्ता कार्यक्रमले चालकलाई सम्मान हुनुका साथै अझै बढी गम्भिर हुन प्रोत्साहन गर्ने बताएका थिए । कार्यक्रममा सामुदायिक सेवा केन्द्र गोरखाका उपाध्यक्ष सुशिलबावु श्रेष्ठ र दरौदी यातायातका पृथ्वीराज मार्ग बस सञ्चालक कम्पनी प्रालि गोरखाका प्रतिनिधी राम भट्ट समेतले सवारी दुर्घटना कम गर्न सवारी चालकको महत्वपूर्ण भूमिका हुने बताएका थिए ।