गोरखा समाचारदाता
गोरखा – नेपाल टेलिकमले असोज १५ गते बाट देशको विभिन्न शहरमा फोरजी सेवा सुरु गर्ने भएको छ ।
पहिलो चरणमा असोज १५ गते दमक, बिर्तामोड, धरान, विराटनगर, इटहरी, जनकपुर, वीरगञ्ज, हेटौँडा, भरतपुर, बुटवल, नेपालगञ्ज, धनगढी जस्तो शहरी क्षेत्रमा फोरजी सेवा सञ्चालनमा आउने भएको हो ।
त्यस्तै गरी रुकुम, बागलुङ, महोत्तरी, रौतहट, सिरहा, बर्दिया, दाङ, धनकुटा, कैलाली, कपिलवस्तु, म्याग्दी, नवलपरासी, पाल्पा, पर्वत जिल्लाहरुको सदरमुकामहरुमा पनि फोरजी सेवा सुरु हुने टेलिकमले जानकारी दिएको छ ।
टेलिकमले फोरजी सेवा सुरु गर्न लागेका ठाउँमा आफ्ना प्राविधिक खटाइसकेको छ । फोरजीको परीक्षण सञ्चालन गर्दा अधिकतम २४५ एमबीसम्मको गतिमा इन्टरनेट चल्ने छ ।
सेवा सुरु हुन लागेका सबै ठाउँमा फोरजीका लागि आवश्यक यू सीमकार्डको पनि व्यवस्था भइसकेको छ । पुराना सिमकार्ड प्रयोगकर्ताले यस्तो सिमकार्ड निःशुल्क साटफेर गर्न सक्ने छन्
टेलिकमले गत माघ २० गते देशैभर फोरजी सेवा सुरु गर्ने तयारी गरी रहेको छ । फोरजी विस्तारका लागि टेलिकमले करिब १९ अर्ब रुपियाँ लगानी गर्दै छ । टेलिकमले यो परियोजनाबाट ६५ लाख फोरजी ग्राहक थप गर्न सक्छ ।
हाल कम्पनीले काठमाडौँ उपत्यका र पोखरामा १८ सय मेगाहर्ज ब्यान्डमा प्रविधि तटस्थतामार्फत फोरजी सेवा उपलब्ध गराइरहेको छ ।
नेपालमै पहिलो पटक २०७३ साल पुस १७ गते फोरजी सेवा सुरु गरेको कम्पनीका यी दुईवटा सहरमा गरी अहिलेसम्म आठ लाख फोरजी ग्राहक छन् ।