गोरखा समाचारदाता
गोरखा – नेपाली नारीहरुको महान पर्व हरितालिका तिज हर्ष उल्लासका साथ मनाइएको छ ।
भाद्र शुक्ल तृतीयाका दिन गोरखा सहित देशभर नारीहरुले व्रत बसी शिव पार्वतीको पूजा, उपासना गरेर सुख, शान्ति र कल्याण कामना गरेका छन् । यो व्रत गर्ने पुरुषले विधुर हुनु नपर्ने, नारीले अटल सौभाग्य र अविाहित केटा केटीले गुण सम्पन्न वर वा वधु पाउने मान्यता छ । सत्ययुगमा हिमालय पुत्री पार्वतीले गौरीघाटमा बसी तपस्या गरेर श्री महादेव पति पाउने वरदान पाएकी थिइन् ।
सोही अनुरुप अविवाहितहरुले आफूले चाहे जस्तो श्रीमान र विवाहिताहरुले आफ्नो, श्रीमानको शुस्वास्थ्य दिर्घायु र समृद्धिको कामना गरी यो पर्व मनाउन थालिएको हो । धार्मिक रुपमा जस्तै तिजको सांस्कृतिक महत्व पनि उत्तिकै छ । महिलाहरुका कथा व्यथालाई गित मार्फत सुनाउने पर्वका रुपमा पनि तिजलाई लिने गरिन्छ ।
पछिल्लो समय तिज पर्वलाई मध्यनजर गरी विभिन्न सांस्कृतिक कार्यक्रमहरु पनि हुन थालेका छन् । रेडियो गोरखाले आयोजना गरेको तिज गीत प्रतियोगिताको उपाधी शुभलक्ष्मी महिला समूह लक्ष्मीबजार पहिलो भएको छ । ९ समूहको सहभागिता रहेको प्रतियोगीतामा लोकतान्त्रिक समाज हरमटारी दोश्रो, लियो क्लव अफ गोरखा तेश्रो र काफलघारी महिला समूह र सतिपिपल महिला समूह सान्तोना भएका छन् ।
पहिलो, दोश्रो, तेश्रो र सान्तोना हुनेले क्रमश २० हजार, १५ हजार, १० हजार र ५/५ हजार नगद पुरस्कारका साथमा प्रमाणपत्र वितरण गरिएको रेडियो गोरखा ९२.८ का स्टेशन म्यानेजर किशोरजंग थापाले जानकारी दिए । कार्यक्रम अवधिभर उत्कृष्ट नृत्य प्रस्तुत गर्ने २० जना भन्दा बढि दर्शकहरुलाई मोबाइल, विभिन्न किसिमका गरगहना, कपडा लगायतको पुरस्कार प्रदान गरिएको उनले बताए । कार्यक्रममा टिका तारमी मगर, प्रेम अर्याल, नारायण दानी लगायत विभिन्न स्थानीय कलाकारहरुले पनि आफ्नो प्रस्तुति देखाएका थिए ।
स्थापनाकाल देखि हरेक वर्ष रेडियो गोरखाले जिल्ला सदरमुकामको रानी पोखरी परिसरमा तिज गित प्रतियोगिता गर्दै आएको छ । यस वर्ष पनि तिजको मौलिक पन जोगाइराख्न कार्यक्रम गरिएको रेडियो गोरखाको मातृ संस्था गोरखा बिकास तथा सञ्चार केन्द्रका अध्यक्ष इश्वरकाजी मास्केले जानकारी दिए ।
त्यस्तै गोरखा नगरपालिका १२ मा तीज गीत प्रतियोगिता सम्पन्न भएको छ । रानीटार टोल विकास संस्थाको आयोजनामा भएको प्रतियोगितामा ११ समुहको सहभागिता रहेको थियो । संस्थाकी उपाध्यक्ष विनिता कुमालको अध्यक्षतामा भएको कार्यक्रममा गण्डकी प्रदेशसभा सदस्य मनकुमारी गुरुङको प्रमुख आतिथ्यता रहेको थियो । प्रतियोगितामा सत्यदेवी टोल विकास संस्था प्रथम भएको छ ।
उसले १० हजार नगद सहित प्रमाणपत्र प्राप्त गरेको छ । त्यस्तै चण्डी भगेरी टोल विकास संस्था दोस्रो, रानीटार टोल विकास संस्था तेस्रो भएका छन् । उनिहरुले क्रमश ७ हजार र ४ हजार ५ सय पुरस्कार पाएका छन् । यसैगरी प्रतियोगितामा खत्रीबेशी टोल विकास संस्थाले सान्त्वना स्थान हासिल गरेको छ ।
त्यस्तै वडा नम्बर १३ मा सुरक्षित तथा उत्थानशिल नीजि आवास पुर्ननिर्माण सम्बन्धी सन्देशमुलक तीज गीत प्रतियोगिता सम्पन्न भएको छ । वडा कार्यालयको प्रतियोगितामा १५ समुहको सहभागिता रहेको थियो । वडाध्यक्ष हरी खनालको अध्यक्षतामा भएको कार्यक्रममा गोरखा नगरपालिकाका प्रमुख राजनराज पन्तको प्रमुख आतिथ्यता रहेको थियो । कार्यक्रमलाई सम्बोधन गर्दै नगरप्रमुख पन्तले सबै जातजातीको कला, संस्कृती जगेर्नामा आफु प्रतिवद्ध रहेको बताएका छन् ।
प्रतियोगितामा प्रगतीशिल महिला समुह प्रथम, सत्यदेवी महिला समुह दोस्रो र दिदिबहिनी महिला समुह तेस्रो भएका छनु भने राजदेवी महिला समुहले सान्त्वना स्थान हात पारेको छ । विजेता समुहले क्रमश १० हजार, ८ हजार, ६ हजार र ३ हजार पुरस्कार सहित प्रमाणपत्र पाएका छन् ।
कार्यक्रममा नेकपाका गण्डकी प्रदेश सदस्य भगवती तिवारी भट्ट, वडा समिति सदस्य मनोजचन्द्र नाराल, समाजवादी पार्टीका रामभक्त खनाल, साविकको देउराली गाविसको पूर्वअध्यक्ष ऋषि खनाल, वडा सदस्य पूर्णिमा दराई लगायतले मन्तब्य राखेको स्थानीय सरोजबाबु अटलले जानकारी दिएका छन् ।
त्यस्तै वडा नम्बर १४ मा अमरज्योती महिला समुहको आयोजनामा समेत तीज गीत तथा नृत्य प्रतियोगिता भएको छ । समुहकी अध्यक्ष कान्दी सेडाईको अध्यक्षतामा भएको कार्यक्रममा नगरप्रमुख राजनराज पन्तको प्रमुख आतिथ्यता रहेको थियो । तीजकै अवसरमा जिल्लाका अधिकांश स्थानीय तहमा औपचारिक कार्यक्रमको आयोजना गरिएको छ ।