गोरखा समाचारदाता
गोरखा – जिल्लाको बारपाक सुलिकोट गाउँपालिका आफ्नै कार्यालय भवनमा सरेको छ ।
गाउँपालिकाको करिब ९५ लाख लगानीमा ११ कोठ पक्की भवन बनेपछि भाडाको घरबाट कार्यालय सारिएको हो । ‘अब भाडा तिर्नुपर्ने बाध्यता हट्यो’ प्रमुख प्रशासकिय अधिकृत शिवबहादुर गुरुङले भने ‘प्रयाप्र्त नभए पनि गत बुधबारदेखि आफ्नै भवनबाट सेवादिन सुरु गरेका छौ ।’ यस अघि बारपाक सुलिकोट गाउँपालिका–६ को पाल्खुबजारमा स्थानीयको घर भाडामा लिएर कार्यालय सञ्चालनहुँदै आएको थियो ।
सोको लागि गाउँपालिकाले मासिक ३७ हजार भाडा तिर्दै आइरहेको थियो । अब भने त्यो बाध्यता हटेको छ । ‘कम्तीमा अब भाडा तिर्नुपर्ने बाध्यता हट्यो’ उनले भने ‘अर्को कुरा आफ्नै भवन भएपछि सेवा प्रवाहमा पनि पक्कै सहज हुन्छ ।’
तर अहिले बनाइएको भवन पनि गाउँपालिकाको प्रमुख भवन होइन । करिब ३९ रोपनी जग्गा गाउँपालिकाको नाममा प्राप्ती गरेको बारपाक सुलिकोटले सुबिधा सम्पन्न कार्यालय भवन बनाउने घोषणा गरिसकेको छ ।
केही समय अघि पूर्व प्रधानमन्त्री एवं नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले उक्त भवनको शिलन्यास गरेका थिए । ‘हामीले किनेको र स्थानीयले दान एवं सहयोग गर्नु भएको गरी झण्डै ३९ रोपनी जग्गा गाउँ पालिकाले प्राप्ती गरेको थियो’ प्रमुख प्रशासयिक अधिकृत गुरुङले भने ‘त्यो मध्ये साडे २ रोपनी प्रहरीलाई दिएका छौं ।
अन्यमा गाउँपालिकाले आफ्नो संरचना निर्माण सुरु गरिसकेको छ ।’
२ नगरपालिका र ९ गाउँपालिका ११ वटा स्थानीय तह रहेको जिल्लामा गोरखा नगर पाकिलाकाको बाहेक अन्यको स्थायी संरचना छैन् । अधिकाशंको भवन निर्माणकै क्रममा छन् । केही स्थानीय तहले भने अहिलेको आवश्यकता परिपूर्ती गर्ने खालका भवन बनाएर कार्य सञ्चालन गरिरहेका छन् ।
