गाेरखा समाचारदाता
गाेरखा – जनै पूर्णिमाका अवसरमा बिहीबार गाेरखा र आसपासका जलाशय एवम् शक्तिपीठमा जनै आमन्त्रण गरिएको छ ।
जनै आमन्त्रणका लागि गोरखा बजारको पुष्करतिर्थमा रहेको रानी पोखरी परिषरमा बिहानै देखी भिड लागेको थियो ।
श्रावण शुक्ल पूर्णिमाकाे दिन वैदिक विधिद्वारा सप्तऋषिलाई तर्पण गरी आमन्त्रित गरिएकाे नयाँ जनै फेर्ने तथा रक्ष बन्धनको डोरो नाडीमा बाँध्ने संस्कृतिलाई निरन्तरता दिन जलाशय एवम् शक्तिपीठमा जनै आमन्त्रण गरिने प्रचलन रहेकाे छ ।
तागाधारीहरूले नयाँ जनै लगाउनका लागि बिहानै उठी स्नान गरी गुरु पुरोहितद्वारा वैदिक मन्त्रोच्चारण सहित सप्त ऋषिलाई तर्पण गरी जल सेचन गराइएको जनैलाई धारण गर्ने परम्परा रहेको गाेरखा बजारका नारायण अज्यालले बताए । तागाधारीले पुरानो जनै फुकाली आजै आमन्त्रण गरिएको नयाँ जनै फेर्ने प्रचलन रहेको अज्यालले बताए ।
कश्यप, अत्रि, भारद्वाज, गौतम, जमदग्नि, विश्वामित्र र बसिष्ठ लगायतका सप्तऋषिलाई तर्पण दिने गरिएकाले यसलाई ऋषि तर्पणीका रुपमा पनि लिने गरिन्छ ।
गुरु पुरोहितबाट हातमा रक्षाबन्धन बाँध्नाले वर्षभर शरीरको रक्षा हुने जनविश्वास रहेकाे छ । गुरु पुरोहितले ‘येनबद्धो बलिराजा दानवेन्द्रो महाबल, तेन त्वं प्रतिबध्नामी रक्षेमा चल मा चल’ मन्त्रोच्चारण सहित यजमानको नाडीमा रक्षबन्धन गर्ने चलन रहेको छ ।
सत्ययुगमा दानवद्वारा लखेटिएका देवगणलाई गुरु बृहस्पतिले रक्षा विधान तयार गरी डोरो बाँधेर जोगाएका थिए भन्ने जनविश्वासले पनि यस पर्वको महत्व रही आएको बताइन्छ ।
आजको दिन केराउ, भटमास, सिमि, बोडी, मास, चना, मस्याङ लगायतका नौ थरिका गेडागुडी मिसाएको क्वाँटी खाने गरिन्छ ।
आजै गाेरखा बजारमा रहेकाे बम्हा कुमारी विश्व बिधालयमा रक्षा बन्धनका लागि भिड लागेकाे थियाे । गाेरखा नगरपालिकाका प्रमुख राजनराज पन्त, प्रमुख जिल्ला अधिकारी देवेन्द्र लामिछाने, रणसिंह दल गणका गणपति प्रमुख सेनानी उज्वल केसी, गाेरखा नगरपालिकाकी प्रमुख प्रशासकिय अधिकृत कृण्णकुमारी श्रेष्ठ, वडाध्यक्षहरू नारायण अयाल र बिण्णु श्रेष्ठ, लायन्स क्लब अफ गाेरखाका अध्यक्ष अच्युतलाल श्रेष्ठ लगायत सयाै सव साधारणकाे उपस्थिती रहेकाे थियाे ।