गोरखा समाचारदाता
गोरखा – सामुदायिक वनका उपभोक्ताहरुले तिन महले कर खारज गर्न माग गरेका छन् ।
चौथो सामुदायिक वन दिवशको अवसरमा आयोजित कार्यक्रमका सहभागीहरुले सामुदायिक वनमा राज्यले तिन तहको कर थोपर्न खोजेका भन्दै असन्तुष्टि जनाएका हुन् । ‘प्रस्तावित वन ऐनमा व्यवस्था भए अनुसार सामुदायिक वनले ९० प्रतिशत सम्म कर दिनु पर्ने देखिन्छ’ सामुदायिक वन उपभोक्ता महासंघका जिल्ला अध्यक्ष कमल लामिछानले भने ‘यो कर हामी तिर्न सक्दैनौं साल र खयरमा अहिले लिइदै आएको १५ प्रतिशत कर नै तिन तहले बाडेर लिनु पर्छ भन्ने हाम्रो धारणा हो ।’
जिविकोपार्जन, वन व्यवस्थापन र सामुदायिक तथा सामाजिक विकासमा लगायतका क्षेत्रमा सरकारको सहयोगीको रुपमा सामुदायिक वनले काम गरेको भन्दै अनावश्यक करका थोपर्नु नहुने सरोकारवालाहरुको भनाई छ ।
महासंघका जिल्ला अध्यक्ष लामिछानेको अध्यक्षता तथा प्रतिनिधि सभा सदस्य हरिराज अधिकारीको प्रमुख आतिथ्यतामा भएको कार्यक्रमका अधिकाशं सहभागी एवं सरकारवालाहरुले सरकारले प्रस्ताव गरेको नयाँ विद्येयक संशोधन हुन बताएका छन् ।
कार्यक्रममा बोल्दै प्रतिनिधि सभा सदस्य अधिकारीले विधेयकमा भएका धेरै कुरा परिर्वतन गर्न सकिने भएकाले आन्दोलन छोडेर सम्बादमा आउन सामुदायिक वन उपभोक्ता महासंघलाई आग्रह गरेको थिए । ‘यो जनताको सरकार हो, तपाइँहरुले बहुमत दिएर नेकपालाई सत्तामा पु¥याउनु भएको हो’ उनले भने ‘प्रस्तावित विधेयक आफैमा पूर्ण नहुन सक्छ यसलाई सच्याउन सकिन्छ । तपाइँ सम्बादमा आउनु पर्छ ।’ विधेयक शंसोधनका लागि वन उपभोक्ता महासंघले आन्दोलन होइन सरकारसँग वार्ता गर्नुपर्ने उनको भनाई छ ।
नेपाल प्राकृतिक रुपमा निकै धनि रहेपनि सामुदायिक वनको उचित व्यवस्थापन हुन नसक्दा जनताले त्यसको प्रतिफल लिन नसकेको भन्दै सांसद अधिकारीले अहिले स्पष्ट नीति ल्याएर व्यवस्थित गर्न खोजेको बताए । फरक राजनितिक प्रशंगमा बोल्दै उनले अब देशमा स्र्वगवाट देवता आएपनि राजतन्त्र नर्फेने दाबी गरेका छन् ।
नेपालको इतिहासमा अहिलेसम्मकै शक्तिशाली जनताको सरकार निर्माण भएको भन्दै उनले यो व्यवस्था र सरकार दुबै सफल भएरै छोड्ने बताए ।
‘सामुदायिक वनमा नवितम् सोच उत्पादन उद्यम र समृद्धिमा जोड’ भन्ने नाराका साथ भएको कार्यक्रममा घले डाँडा राना खोला सामुदायिक वनको लागेको डढेलोमा निभाउने क्रममा जलेर मृत्यु भएका शहिद लखन गाउँपालिकाका–८ स्थानीय पहलमान श्रेष्ठको परिवारलाई बिमा वापद प्राप्त भएको १ लाख रकम हस्तान्तरण समेत गरिएको थियो ।
सामुदायिक वन महासंघले गरेको सामुहिक जीवन बिमा कार्यक्रम मार्फत उपलब्ल भएको उक्त रकमको चेक प्रमुख अतिथि अधिकारीले मृत्तककी श्रीमती हिरामायाँ श्रेष्ठलाई हस्ताण्तरण गरेका हुन् ।
कार्यक्रममा सामुदायिक वन उपभोक्ता महासंघकी केन्द्रिय अध्यक्ष भारती पाठक, गण्डकी प्रदेश अध्यक्ष कालीदास सुवेदी, जिल्ला समन्वय समितिका प्रमुख अशोककुमार गुरुङ, पूर्व सांसद कृष्ण धिताल, डिविजन वन प्रमुख तोयानाथ पौडेल, आदिवासी जनजाती महासंघ जिल्ला समन्वय परिषद्का अध्यक्ष विष्णु रानामगर, पत्रकार महासंघका अध्यक्ष किशोरजंग थापा, भीमसेन थापा वन महासंघका अध्यक्ष सादुराम थापा, गोरखा नगरपालिका वन महासंघकी अध्यक्ष निर्मला थापा, विरेञ्चोक सामुदायिक वनका अध्यक्ष भुरमण घिमिरे लगायतले मन्तव्य राखेका थिए ।
सोही अवसरमा बारपाकको रागर सामुदायिक वनले उत्पादन गरेको बारपाकी सिस्नु पाउडर समेत बिक्रि भएको थियो । जिल्ला वन डिभिजनको तथ्याङ्क अनुसार ५०० भन्दा बढि सामुदायिक वन छन् । ती मध्ये ४०० भन्दा बढि महासंघमा आवद्ध रहेको सामुदायिक वन उपभोक्ता महासंघले जनाएको छ ।
