गोरखा समाचारदाता
गोरखा – गोरखा नगरपालिकाका मेयर राजनराज पन्तले पुनर्निर्माणलाई गति दिन प्रबलिकरणमा परेका घरहरुको महत्वपुर्ण भुमिका रहेको बताए ।
गोरखा नगरपालिकाको आयोजना तथा भारत सरकारद्धारा सहयोग प्राप्त नेपाल आवास पुनर्निर्माण परियोजनाको सहजिकरणमा प्रबलिकरण सम्बन्धि अन्र्तक्रिया कार्यक्रममा बोल्दै मेयर पन्तले यस्तो कुरा बताएका हुन ।
अन्तरक्रिया कार्यक्रममा पन्तले निजी आवासमा प्रबलिकरण गर्न सम्भव रहेका घरमा जनप्रतिनिधिले सहि सन्देश दिन आवश्यक रहेको बताउदै स्थानीय स्तरमा सरोकारावाला निकायबीच समन्वय गरेर समस्याको समाधान गर्न अनुरोध गरे ।
मेयर पन्तले सरोकारवाला निकायले प्रबलिकरण गरिएका नमूना घर प्रर्दशन गरेर समुदायमा सचेतना फैलाउन सक्ने र परियोजनामा रहेका आवास निर्माण साथी संगै डकर्मीहरुको क्षमता विकास गर्न सके प्रबलिकरण कार्यमा सघाउ पुग्ने बताए ।
कार्यक्रममा जिल्ला कार्यन्वयन इकाई अनुदान व्यवस्थापन तथा स्थानीय पूर्वाधार (जिमाली) का आयोजना प्रमुख इन्जिनियर रामशरण आचार्यले भुकम्प प्रभावित घरधनीलाई प्राविधिकको सल्लाहमा र कम खर्चमा प्रबलिकरण गर्न सकिने सन्देश जन प्रतिनिधिले दिन आवश्यक रहेको बताए ।
आचार्य गोरखा नगरपालिकामा १ हजार १ सय ३६ घर प्रबलिकरण गनुपर्ने सूचीमा रहेको जानाकारी दिदै उचित ज्ञान तथा दक्षताको अभावमा घरको प्रवलिकरण गर्दा दुर्घटना निम्तन सक्ने तर्फ सचेत गराएका थिए ।
सोही कार्यक्रममा जिल्ला कार्यान्वयन इकाई भवनकी प्रमुख इन्जिनियर सुनिता श्रेष्ठले निजी आवासमा प्रबलिकरण पुनर्निर्माण जस्तो कामका लागि विज्ञता भएको प्राविधिकको आवश्यकता रहेको बताइन ।
प्रबलिकरण सम्बन्धी निश्चित निर्देशिका तथा आम जनसमुदायमा सचेतानाको अभाव रहेकाले पनि केही प्राविधिक कठिनाई रहेको बताईन । कार्यक्रममा श्रेष्ठले जिल्लाको सबै स्थानीय तहमा दशैं अगावै प्रबलिकरण सम्बन्धी तालिम दिइने लक्ष्य रहेको समेत बताइन ।
कार्यक्रममा सहभागी गोरखा नगरपालिकाका जनप्रतिनिधिले भुकम्प प्रभावित घरधनी प्रबलिकरण सम्वन्धी कार्यको दुविधा रहेकाले उचित समयमा सचेतना दिन आवश्यक रहेको बताए ।
कार्यक्रममा स्ट्रक्चरल इन्जिनियरका विज्ञ राजेन्द्र देशाईले प्रबलिकरण तालिम प्राप्त दक्ष प्राविधिकद्धारा घर प्रबलिकरण गरेको खण्डमा त्रासको स्थिती नरहने बताए । प्रबलिकरण पुनर्निर्माण गरिने घर भन्दा १५ देखि २० प्रतिशत सस्तो मुल्यमा काम सम्पन्न हुने देशाइएले बताए ।
परियोजनाका जिल्ला संयोजक राम सापकोटाले जिल्लामा रहेका प्रबलिकरण गर्न आवश्यक घरपहिचान गरी सम्बन्धित पालिकासंग समन्वय गरेर सहजिकरण गर्न तयार रहेको बताए ।
कार्यक्रममा गोरखा नगरपालिकाका जन प्रतिनिधिहरु, प्राधिकरणका इन्जिनियरहरु, नगरपालिकाका कर्मचारीहरु र परियोजनका कर्मचारीहरुको उपस्थिती रहेको थियो ।