गोरखा समाचारदाता
गाेरखा – गोरखा नगरपालिकाका प्रमुख राजनराज पन्तले निर्माण सम्पन्न भएका घरको अभिलेख राख्न आग्रह गरेका छन् ।
वडा नम्बर ४ फिनामको कुवापानीका ९७ बर्षीय रेशमबहादुर अधिकारीलाई घर निर्माण सम्पन्नताको प्रमाण पत्र हस्तान्तरण गर्दै पन्तले नगर क्षेत्रमा बनेका सबै घर नगरपालिकामा सूचीकृत गर्नुपर्ने बताए ।
यसै क्रममा उनले सम्पुर्ण नगरवासीलाई नक्सापास गरेर मात्र भुकम्प प्रतिरोधी घर निर्माण गर्न तथा निर्माण भइसकेका निजी आवासलाई अनिवार्य रुपमा अभिलेखिकरण गर्न नगरवासीलाई आग्रह गरेका छन् ।
भारत सरकारद्धारा सहयोग प्राप्त नेपाल आवास पुनर्निर्माण परियोजना बाट सामाजिक प्राविधिक सहजिकरणमा उक्त घर निर्माण गरिएको हो ।
उक्त परियोजनाका कारण गोरखा नगरपालिकालाई पुर्ननिर्माणको काम अघि बढाउन निकै सहज भएको भन्दै उनले अन्य क्षेत्रमा उल्लेख्य सहयोग मिलेको बताए ।
वडा नम्बर ४ का वडाध्यक्ष खोपबहादुर अधिकारीले परियोजन र प्राधिकरणको सहयोगमा आफ्नो वडामा निजी आवास पुनर्निर्माणको कामले ८० प्रतिशत गतिलिएको बताए ।
परियोजनाकै कारण भुकम्प प्रभावित घरधनीको विवरण लिएर पुनर्निर्माणको अध्यावधिक गर्न वडालाई पनि सफल भएको उनको भनाई छ । घर निर्माण सम्पन्न भएसँगै वृद्ध अधिकारीले समेत खुसि व्यक्त गरेका छन् ।