गोरखा समाचारदाता
गोरखा–गोरखा दरवार पुर्नःनिर्माणमा भइरहेको लापरवाही प्रति गण्डकी प्रदेश सभा मार्फत साँसद मनकुमारी गुरुङले सरकारको ध्यानाकर्षण गराएकी छिन् ।
ऐतिहासिक धरोहरका रुपमा विश्वमा परिचित दरवारलाई भत्काएर ठेकेदारले अपलत्र बनाएको भन्दै उनले आवस्यक समन्वय गरी काम अघि बढाइदिन सरकार समक्ष अनुरोध गरेकी छिन् ।
भूकम्पमा ध्वस्त भएको दरर्वारलाई पुर्नःनिर्माण गर्न डेढ बर्ष अघिबाट काम सुरु गरेको भएता पनि हालसम्म जग मात्रै हालिएको र ठेकेदार कम्पनीले लापरवाही गरेको भन्दै साँसद गुरुङले सरकारको ध्यानाकर्षण गराएकी हुन् ।
सोमबार प्रदेश सभा बैठकमा बोल्दै उनले भनिन् ‘गोरखा भनेर विश्वलाई चिनाएको ऐतिहासिक धरोहर निर्माणको काम डेढ बर्षसम्म जगमै बितेको छ’ उनले भनिन् ‘यसमा कसले चासो दिने हो, इतिहास मेटाउने छुट कसैसंग छैन, लापरवाही गर्ने ठेकेदारलाई कारबाही गरी तुरुन्त बाँकी काम अघि बढाइयोस् ।’
त्यस्तै उनले ठेकेदारको लापार्बाहीकै कारण बारपाक सडक बर्षौंदेखि अलपत्र रहेको उनले आरोप लगाएकी छिन् ।
केही दिनअघिको बाढीले भुसुण्डेफाँट, दरौंदी फाँट, ज्यादीखोला फाँट, लुदीखोला फाँटमा लगाइएको धानबाली तहसनहस बनाएकोले ती खोलाहरुमा तटबन्ध गरिनुपर्ने साँसद गुरुङले माग गरेकी छिन् । त्यस्तै उनले विकास निर्माणका काम गुणस्तरीय बन्न नसकेको प्रति चिन्ता समेत ब्यक्त गरेकी छिन् ।
विकास निर्माणका काममा ढिलाई गर्ने र गुणस्तरीय काम नगर्ने ठेकेदारलाई सरकारले कडा कारबाही गर्न सक्नुपर्ने भन्दै उनले दिन प्रति दिन बढ्दै गएको बेरोजगारी र बिदेश पलायन हुने अवस्थालाई रोक्न सक्नुपर्ने तर्क राखिन् ।