गाेरखा समाचारदाता
गाेरखा-आइतबार गण्डकी प्रदेश सभामा विशेष समय लिएर सांसद प्रकाशचन्द्र दवाडीले सरकारको ध्यानाकर्षण गराएका छन् ।
उनले केहि दिन अघि गोरखाको भूसुण्डे खोला र दरौँदी नदीको बाढीले भुसुण्डे फाँटमा धानखेतीमा ठुलो नोक्सान पु¥र्याएको र क्षतिको विवरण संकलन गरी किसानलाई राहत दिन पनि आग्रह गरे ।
त्यस्तै उनले पालुंटारको वडा नम्बर ३ र १० मा रहेको १५ घरधुरीको दलित बस्ती पहिरोले उच्च जोखिममा रहेको भन्दै सरकारको ध्यानाकर्षण गराए । उनले यस्ता पिडित जनतालाई सरकारको कुन निकायले राहतको ब्यवस्था गर्ने हो भन्दै सरकारलाई प्रश्न समेत गरे ।
सांसद दवाडीले गोरखा नगरपालिकाको वडा नम्बर ११, ४ र ६ मा भूकम्प पिडितले बनाएको घर पहिरोको उच्च जोखिममा रहेको समेत संसदमा जानकारी गराए ।
त्यस्तै सुलिकोट गाउँपालिका वडा ६ ताकुमा एकनारायण भट्टको घरमा भ्वान परेर बस्न नमिल्ने भएको उनले बताए । एकनारायण भट्टको यस अघि नै मृत्यु भएको र उनकी श्रीमतीको विचल्ली भएको भन्दै उनले सरकारको ध्यानाकर्षण गराएका थिए ।
उनले सोही ठाउँका रामेश्वर भट्ट, पुरुषोत्तम भट्ट लगायतको १५ घरमा पनि जोखिम बढेको र ती घरहरु तत्कालै स्थानान्तरण गर्नु पर्ने अबस्था रहेको बताए ।