कैलासबावु श्रेष्ठ/गोरखा
असार २३ गते । गोरखा नगरपालिकाले नगरलाई हरियाली नगरमा परिणत गर्ने भन्दै युवा परिचालनलाई ब्यापकता दिएको छ ।
‘एक यूवा एक बिरुवा, हरियो बातावरण हाम्रो अभियान’ नारा दिएको नगरपालिकाले यसै आर्थिक बर्ष भित्र नगरको सबै स्थानमा गरेर १० हजार विभिन्न प्रकारको बिरुवा लगाउनका लागि स्थानिय युवाहरुलाई परिचालन गरेको हो । अभियानको पहिलो दिन सोमबार गोरखा नगरपालिका–८ को ढुङ्गागाडेबाट अभियानको शुरु गरीएको छ ।
अभियानको उदघाट्न गर्दै नगर प्रमुख तथा उप प्रमुख राजनराज पन्त र बिनाकुमारी श्रेष्ठले शिवमन्दिर परिषरमा रुद्राक्षको बिरुवा लगाएर कार्यक्रमको प्रारम्भ गरेका थिए । नगर युवा स्यम सवेक सञ्जालको आयोजना तथा नगरपालिकाको सहयोगमा नगर क्षेत्रको १४ वटा वडामा सोमबार बिहान एकै समयमा ७ सय विभिन्न प्रकारको विरुवा लगाएर कार्यक्रमको शुरु गरीएको थियो ।
रुद्राक्ष, एभोकाडो, अमला, बकाईनो, अनार, निमारो, जामुन, तेजपत्ता, बेल, कल्की जस्ता विरुवाहरु पहिलो दिनमा लगाईएको थियो । थप विरुवा १÷२ दिन भित्र आउने र सबै वडालाई वितरण गरीने नगरपालिकाले जानकारी दिएको छ । दोस्रो चरणमा वितरण गरिने विरुवाहरुमा विशेष गरी फलफुलको बोटहरु रहने नगरपालिकाका बातावरण अधिकृत ध्रुवप्रसाद घिमीरे बताए । घिमिरेका अनुसार जलवायु परिवर्तन देखीएको असरलाई समेत यसले केही हद सम्म सहयोग पुग्ने बताए ।
कार्यक्रममा बोल्दै नगरप्रमुख पन्तले अब देखी नगर भित्रको युवाहरुको लागि गरिने सबै कार्यक्रम सञ्जाल मार्फत गरीने र युवाहरुको आवश्यताका आधारमा कार्यक्रम सञ्चालन गरिने बताए ।
कार्यक्रममा वडा नम्बर ८ का वडाध्यक्ष कृण्णबहादुर खत्रीले आगामि बर्षमा आउने बजेटले शिव मन्दिर परिषरलाई हरियाली पार्क निर्माणमा सहयोग गर्ने स्थानियलाई बचन दिए । बृक्षार रोपण कार्यक्रममा स्थानियहरुको ठुलो सहभागिता रहेको थियो । कार्यक्रम सञ्जालका अध्यक्ष अनिल राना मगरको अध्यक्षतामा सम्पन्न भएको थियो ।
