गोरखा समाचारदाता
जिल्लामा अदालत गोरखामा मुद्दाको चाङ बढेको छ । हालसम्म २७३ थान मुद्दा फछ्यौट हुन बाँकी रहेका जिल्ला अदालत गोरखाका स्रेस्तेदार विनोदप्रसाद अधिकारीले जानकारी दिए । हालसम्म ५ सय ५५ थान मुद्दा दर्ता हुन आएकोमा २८२ वटा फछ्यौट भएको देखिन्छ ।
यो तथ्याङ्क असार ८ गते सम्मको हो । फैसला हुन बाँकी मध्ये २७६ थान मुद्दा एक वर्ष भित्र दर्ता भएका हुन् भने, ६ वटा १८ महिना देखि प्रक्रियामा रहेको देखिन्छ । ती मध्ये सबै भन्दा धेरै १८६ दुनियाबादी देवानी, ६१ सरकारवादी फौजदारी र २६ थान दुनियाबादी फौजदारी शीर्षकमा मुद्दा छन् ।
फछ्यौट भएका मध्ये २७५ अघिल्लो महिनासम्मको तथ्याङ्क हो भने ७ थान मुद्दा असारको पहिलो हप्तामा फैसाला भएको जिल्ला अदालत गोरखाले जानकारी दिएको छ । ती मध्ये १९१ दुनियाबादी देवानी, ४० सरकारवादी फौजदारी र ५१ थान दुनियाबादी फौजदारी मुद्दा यो वर्षमा फैसला भएको देखिन्छ । जिल्ला अदालत गोरखामा असार ८ गते सम्म ५५५ थान मुद्दा दर्ता भएका छन् ।
ति मध्ये ९३ मुद्दा जिम्मेवारी सरेर, ४४८ जेठ मसान्तसम्म दर्ता हुन आएका र १४ असारको पहिलो साता अर्थात ८ सम्म दर्ता भएका मुद्दा रहेको अदालत स्रोतको भनाई छ । त्यसमा ३७७ दुनियाबादी देवानी, १०१ सरकारवादी फौजदारी र ७७ थान दुनियाबादी मुद्दाको लगत कायम भएको जिल्ला अदालत गोरखाले जानकारी दिएको छ । ‘यो आर्थिक वर्ष सकिएपछि हामी वार्षिक रिर्पोट निर्माण गछौं’ स्रेस्तेदार अधिकारीले भने ‘अनि सबै डिटेल सार्वजानिक हुन्छ ।’
जिल्लामा हाल ६१ थान थुनुवा मुद्दा रहेको अदालत श्रोतले बताएको छ । ती मध्ये ५४ पूरुष, ७ महिला र १ नाबालक रहेको अदालतको तथ्याङ्कमा उल्लेख छ । पछिल्लो समय विभिन्न खालका अपाराधिक घटना बढेसँगै अदालतमा मुद्दाको चाप बढेको छ । स्थानीय निर्वाचन पछि बनेका न्यायिक समितिले सामान्य प्रकृतिका मुद्दा स्थानीय स्तरमै मिलाएर पठाउने गरेपनि अन्य मुद्दाहरुको चाप बढि रहेको सरोकारवालाहरु बताउँछन् । अदालतमा मुद्दाको चाङ बढि हुँदा न्याय सम्पादनमा ढिलाई हुने गरेको न्याय क्षेत्रका उपभोक्ताहरुको गुनासो छ ।
