गोरखा समाचारदाता
चैत्र २० गते । प्रधानमन्त्री केपी शर्मा ओलीले समृद्धि अभियानमा केन्द्रित हुन सबै राजनीतिक दलहरुलाई आग्रह गरेका छन् । बुधबारबाट सुरु भएको राष्ट्रिय विकास परिषद बैठकको उद्घाटन गर्दै प्रधानमन्त्री ओलीले ५ वर्ष भित्र मुलुकबाट भोकमरी अन्त्य गर्ने गरी सरकारले काम गरिरहेको बताउँदै त्यही अनुसार आवश्यक योजना बनाउनका लागि सुझाव दिन समेत आग्रह गरे ।
प्रधानमन्त्री ओलीले सरकार अधिनायकवादको बाटोमा नभई समाजवादको बाटोमा हिँडिरहेको दाबी गरे । उनले सरकार अधिनायकवादी भयो भनेर झुटो प्रचार भइरहेको बताए । ‘सरकार अधिनायकवादी होइन, समाजवादी बाटोमा र अझ बढी लोकतन्त्रतिर अघि बढ्दैछ’ उनले भने ‘समतामूलक समाज निर्माण गर्न तिब्र गतिका साथ अघि बढ्दैछ, यस अवसरलाई हामी कसैले पनि तलमाथि गर्नु हुँदैन ।’
उनले निरक्षरता उन्मुलन गर्ने, मानव स्वास्थ्यलाई ध्यानमा राखेर स्वच्छ खाद्य बस्तु उत्पादन गर्ने, ठूलो मात्रामा बस्तुहरुको उत्पादन गरी निर्यात व्यापार बढाउँदै लैजाने सरकारको योजना रहेको पनि बताए ।
बैठकका लागि राष्ट्रिय योजना आयोगले आगामी २५ वर्षमा समुन्नत, स्वाधीन र समाजवाद उन्मुख अर्थतन्त्रसहितको समान अवसर प्राप्त, स्वस्थ, शिक्षित, मर्यादित र उच्च जीवनस्तर भएको मुलुकको परिकल्पना गर्दै विकास रणनीति बनाएको हो । २१ औं शताब्दीसम्म नेपालीको आय प्रतिव्यक्ति आय १२ हजार ५ सय अमेरिकी डलर पु¥याउने मार्गचित्रसहितको १५औं अवधारणा पत्र तयार पारेको हो ।