गोरखा समाचारदाता
चैत्र १९ गते । पालुङ्टार नगरपालिकाका प्रमुख ई.दिपकबाबु कंडेलले आफूले पाउने भत्ताबाट गरिब तथा असहाय वर्गको स्थास्थ्य बिमा गर्ने घोषणा गरेका छन । नगरप्रमुखका नाताले पाउने भत्ताको रकमबाट विपन्न समूदायका व्यक्तिहरुलाई स्वास्थ्य बिमा गर्ने उनले घोषणा गरेका हुन् । ‘सरकारले सञ्चालन गरिरहेको स्वास्थ्य बिमाको प्रभाव पालुङ्टारमा निकै राम्रो छ । तर कतिपयले आर्थिक अभावका कारण उक्त बिमा गर्न सक्नुभएको छैन’ उनले भने ‘त्यस्ता नागरिकहरुको पहिचान गरी निशुल्क स्वास्थ्य बिमा गराइदिने मेरो लक्ष्य हो ।’
नागरिकले पैसाको अभावमा अस्पतालसम्म जान नसकी रोग पालेर बस्नु पर्ने बाध्यताको अन्त्य गर्दै सबैलाई स्वास्थ्य सेवाको पहुँचमा पुरयाउने उनको योजना छ । ‘म नगरप्रमुख भएपछि विभिन्न बैठकमा सहभागी हुँदा, अनुगमन जादाँ प्राप्त भत्ता रकम बैंकमा जम्मा गरेर राखेको छु’ उनले भने ‘सो रकमबाट प्रत्येक वडाको कम्ति ४/५ जनालाई बिमा गराउने मेरो सोच छ ।’ हाल सम्म करिब ५० हजार रकम संकलन भएको र अब प्राप्त हुने रकम समेत उक्त कार्यक्रममा खर्च गर्ने उनले बताए ।
केही दिन भित्र हरेक वडाबाट त्यस्ता व्यक्तिहरुको पहिचान गरी उनीहरुको बिमा गराउने तयारी छ । ‘हुन त मनि त्यहीँ गाउँको मान्छे हुँ धेरै नगरबासीको अवस्था मलाई पनि थाहा छ’ उनले भने ‘तर पनि मैले वडा अध्यक्ष ज्यूहरुलाई छनौटको जिम्मा दिएको छु, उहाँहरुले व्यक्तिको पहिचान गर्नु हुन्छ, अनि हामी बिमा गराउँछौं ।’ त्यसरी गर्दा छनोट पारदर्शी भई वास्तविक व्यक्तिको पहिचान हुने उहाँको विश्वास छ ।
अहिले नेपाल सरकारले देशभर स्वास्थ्य विमा कार्यक्रम सञ्चालन गरिरहेको छ । जसअनुसार २ हजार ५०० रुपैयाँ खर्च गरी विमा गरेपछि ५० हजार सम्मको स्वास्थ्य सुबिधा लिने पाउने प्राबधान छ । यो सुबिधा एक परिवारका ४ जनासम्मले पाउछन् । धेरै सदस्य रहेको परिवारले भने अतिरिक्त रकम थप गर्नुपर्छ । ‘यो प्रयासले स्वास्थ्यमा नागरिकको सहज पहँुच अभिवृद्धि गर्न केही हदसम्म भएपनि मद्धत मिल्छ भन्ने लागेको छ’ उनले भने ‘जसले गर्दा उपचार बिना अकालमा हुने मृत्युलाई रोक्न सकियोस् ।’
स्वास्थ्य बिमा गराएका नागरिकले सरकारी तथा सामुदायिक अस्पतालहरुमा उपचार गराउन पाउने व्यवस्था मिलाइएको छ । गोरखामा जिल्ला अस्पताल गोरखा र आँपपिपल अस्पताल पालुङ्टारमा यो सेवा उपलब्ध छ । यदि यहाँ उपचार हुन नसके देशका अन्य अस्तापलमा पनि रिफर गर्न सकिने पालुङ्टार नगरपालिकाका स्वास्थ्य शाखा प्रमुख दिपेन्द्र गिरीले जानकारी दिए ।