गोरखा समाचारदाता
चैत्र १६ गते । २ वर्ष अघि चितवन राष्ट्रिय निकुञ्जबाट बाढीले बगाएर भारत पुरयाएको ३ गैँडा फिर्ता ल्याउन कठिन भएको छ । पटक पटक पत्राचार गर्दा पनि भारतिय पक्षले चासो नदेखाएका कारण ति गैडा नेपाल ल्याउन कठिन भएको हो ।
विसं २०७३ साउन अन्तिम साता आएको बाढीले बगाएका मध्ये १० गैँडा उद्धार गरी ल्याई सकिएको छ । तत्कालै निकुञ्जले समन्वय गरी नौ गैँडा उद्धार गरेर ल्याएको थियो र त्यसको झण्डैं १ वर्षपछि नेपाल छिरेको मौका पारेर अर्को १ गैँडा उद्धार गरी निकुञ्जमा ल्याइएको भएता पनि ३ गैडा अझै ल्याउन सकिएको छैन ।
चितवन राष्ट्रिय निकुञ्ज हुँदै बग्ने नदीले बगाएर ती गैँडा भारतको वाल्मिकी टाइगर रिजर्भ र डिभिजन फरेस्टमा पुगेका थिए ।
निकुञ्जका प्रमुख संरक्षण अधिकृत वेदकुमार ढकालका अनुसार हाल भारतीय भूमिमा रहेका भनिएका गैँडा ल्याउनका लागि केही महीनाअघि पत्रचार गरिएको भए पनि प्रतिउत्तर आएको छैन । निकुञ्जले परराष्ट्र मन्त्रालयमार्फत पनि पहल गरिरहेको छ । यद्यपि भारतीय पक्षबाट जवाफ नआएकाले गैँडा ल्याउन नपाइएको ढकालले बताए ।
भारतीय अधिकारीहरुले तीन गैँडा रहेको जनाएपछि निकुञ्जले पहल शुरु गरेको थियो । बाढीका कारण गैँडासँगै अन्य धेरै जनावर पनि बगेर भारत पुगेका थिए । सो क्रममा साना धेरै वन्यजन्तु मरेको जनाइएको थियो ।
पछिल्लो गणनाअनुसार निकुञ्जमा ६०५ गैँडा छन् । यसै आर्थिक वर्षमा पुनःगैँडाको गणना गर्ने भनिए पनि दाताको टुङ्गो नलाग्दा गणनाको मिति तय भएको छैन । बाढीले धेरै गैँडा पश्चिमी क्षेत्रमा पुर्याएपछि प्राकृतिक कारणले मर्ने क्रम बढेर गएको छ । चालू आर्थिक वर्षको हालसम्म राष्ट्रिय वन क्षेत्रमा २ सहित ४१ गैँडा प्राकृतिक कारणले मरिसकेका छन् ।