गोरखा समाचारदाता
चैत्र १६ गते । विभिन्न परियोजनामा सम्झौता र समझदारी गरेर तेस्रो लगानी सम्मेलन सनिबार सकिदै छ ।
राजधानीको होटल सोल्टीमा जारी सम्मेलनको दोस्रो दिन लगानीकर्ताहरुका अनुभव समेटिएका विभिन्न सत्रमा छलफल पछि सम्झौता र समझदारीमा हस्ताक्षर गर्ने कार्यक्रम रहेको छ ।
नेपालमा लगानीको सम्भावना रहेका कृषि, बन, पूर्वाधार विकासका सत्रहरुमा पनि समूहगत छलफल हुने छ । सम्मेलनका क्रममा १२ वटा विभिन्न परियोजनामा लगानी सम्बन्धी सम्झौता र समझदारी हुने लगानी बोर्डले जानकारी दिएको छ ।
गैर आवासीय नेपाली संघ र सरकारबीच पूर्वाधारमा लगानी गर्ने गरी १० अर्बको कोष स्थापना गर्ने सम्झौता पनि हुने भएको छ ।
सम्मेलनका क्रममा जलविद्युत, कृषि, उद्योग, पर्यटन यातायात लगायतका सार्वजनिक क्षेत्रका ५० र निजी क्षेत्रका २७ आयोजनामा लगानी आह्वान गरिएको छ । शुक्रबारदेखि शुरु भएको सम्मेलनमा ४० देशका ६ सय भन्दा बढी विदेशी लगानीकर्ता सहभागी छन् ।