गोरखा समाचारदाता
चैत्र १४ गते । नेपाल र भारतका परराष्ट्र सचिवहरुको बैठक काठमाडौंमा जारी छ । परराष्ट्र सचिवस्तरीय बैठकमा सहभागि हुन भारतीय विदेश सचिव विजय गोख्ले बिहीबारविहान काठमाडौंमा आइपुगेका हुन् । जारी बैठकमा नेपाली पक्षको नेतृत्व शंकरदास वैरागीले गरेका छन् । बैठकमा नेपाल र भारतका प्रवुद्ध समूह ‘इपीजी’ले तयार पारेको संयुक्त प्रतिवेदन लगायतका विषयमा छलफल हुने छ ।
बैठकमा प्रधानमन्त्री ओलीको भारत भ्रमण र भारतीय प्रधानमन्त्री मोदीको नेपाल भ्रमणका क्रममा भएका सम्झौता कार्यान्वयनको अवस्थाको समेत समिक्षा हुने परराष्ट्र मन्त्रालयले जानकारी दिएको छ ।
प्रतिवेदन भारतले बुझ्न अस्वीकार गरिरहेको समयमा दुईपक्षीय छलफल भएको हो । नेपाल र भारतबीच गत फेब्रुअरीमा परराष्ट्र मन्त्रीस्तरीय छलफल हुने तय भएको थियो ।
तर लोकसभा निर्वाचनमा भारतीय विदेशमन्त्री सुष्मा स्वराज ब्यस्त हुनु परेका कारण बैठक हुन सकेको छैन ।