गोरखा समाचारदाता
चैत्र १३ गते । नेपाली कांग्रेसका महामन्त्री डा. शशांक कोइरालाले सिके राउतसँग वार्ता गर्ने तर नेत्रविक्रम चन्द नेतृत्वको नेकपा माथि प्रतिबन्ध लगाएर सरकारले ठूलो भुल गरेको बताएका छन् । नेपाल प्रेस युनियन दाङले मंगलबार आयोजना गरेको पत्रकार सम्मेलनमा कोइरालाले हरेक समस्याको समाधान वार्ताबाट गर्नुपर्ने बताए ।
कोइरालाले चन्द नेतृत्वको नेकपालाई तत्काल वार्तामा ल्याएर समस्याको समधान गर्न सरकारलाई अनुरोध समेत गरे । कम्युनिष्टहरु निरंकुशतातर्फ अगाडि बढेको आरोप लगाउँदै कोइरालाले प्रधानमन्त्रीले सेनालाई आफ्नो मताहतमा राखेर निरंकुशतर्फ उन्मुख हुन लागेको पुष्टि गरेको दाबी गरे ।
