चितवन — मान्छेको मृत्यु भएपछि पनि आँखाको नानी तत्कालै मर्दैन । त्यो नानी झिकेर आँखाको समस्या भएका अन्य व्यक्तिमा राख्न मिल्छ । विविध कारणहरुले बीचमा आँखा देख्न छाडेकाहरुले नानी प्रत्यारोपणपछि नयाँ ज्योती पाएका छन् । यस्तो काममा सघाउन भरतपुरमा स्थापना भएको आँखा बैंकका लागि एकजना व्यक्तिले मन खोलेर सहयोग गरेका छन् । भरतपुर आँखा अस्पतालमा आँखा बैंक खुलेको दुई वर्ष हुन लाग्दैछ ।
आँखा अस्पताल हाताभित्र ‘भिमराज उषामाया पाठक आँखा बैंक’ रहेको छ। सो आँखा बैंकका लागि भरतपुर महानगरपालिका-१२ पूर्णिमा टोलका भिमराज पाठकले एक करोड ५० लाख रुपैयाँ उपलब्ध गराएका हुन्। ‘रकम उपलब्ध भएपछि हामीले पाठक दम्पतीका नाममा नै आँखा बैंक सञ्चालन गरेका छौं। भिमराज जीले दिएको रकम अक्षय कोषमा छ,’ नेपाल नेत्र ज्योती संघ चितवन शाखाका अध्यक्ष कृष्णराज धरेलले भने।
अक्षय कोषको ब्याजको रकमले आँखा बैंक सञ्चालन खर्च जुटिरहेको धरेलले बताए। नेपाल नेत्र ज्योती संघले नै विस २०४४ सालको चैत्रमा भरतपुरमा आँखा अस्पताल सञ्चालन गरेको हो। विस २०७४ सालको असारबाट आँखा बैंक सुरु भएको हो। त्यसयता ५५ जनामा आँखाको नानी प्रत्यारोपण भएको छ। मृतक चारजना व्यक्तिका आठवटा नानी संकलन भएको अध्यक्ष धरेलले जानकारी दिए।
कुनै पनि व्यक्तिको निधन भएको ६ सात घण्टाभित्र यसको आँखाको नानी झिक्न सकेमा अरुमा प्रत्यारोपण गर्न सकिन्छ। ‘आँखा दान गर्न इच्छुक व्यक्तिले पहिले नै अस्पतालमा इच्छापत्र बुझाएको हुन्छ। उसको निधन भएपछि परिवारले खबर गर्छन र हामी गएर नानी झिक्छौं। त्यसपछि त्यो नानी प्रशोधनका लागि काठमाडौंको तिलगंगा आँखा अस्पताल पठाउँछौं,’ अध्यक्ष धरेलले भने।
नानीमा चोट लागेका, दाग देखिएका, फुलो परेर दृष्टी गुमेका व्यक्तिका आँखामा त्यस्ता नानी राख्न सकिन्छ। ‘भरतपुरमा यस्तो महत्वपूर्ण काम गर्ने सोच बनाउँदा पाठक जीले धेरै ठूलो सहयोग गर्नु भयो,’ अध्यक्ष धरेलले भने। ७४ वर्षअघि जन्मेका भिमराज विसं २०१७ सालमा नै जन्मस्थान धादिङ गजुरीबाट चितवन झरेका हुन्। सुरुमा उनीहरु पूर्वी चितवनमा बसे। ०३९ सालदेखि भरतपुरमा आएका हुन्।
‘उ बेला पूर्वी चितवनमा भात खान भनेर खेत किनेका थियौं। त्यही खेत बेचेको केही रकम अरु काममा पनि खर्च भयो। बँचेको रकम आँखा बैंकका लागि दिएका हौं,’ पाठकले भने। सामाजिक काममा पनि लागेका पाठक क्षयरोग निवारण संस्थाका चितवन अध्यक्ष पनि भएका थिए। सामाजिक काममा सक्रिय भएका कारण उपयुक्त ठाउँमा सम्पति खर्च गर्ने मनोभावना जागेको उनले बताए।
‘यो धन पैसा सम्पत्ति राखेर के नै गर्नु छ र? आवश्यक ठाउँमा खर्च भयो भने समाजको हित हुन्छ। कुनै कारणले आँखाको ज्योति गुमेकाहरुले फेरि देख्न पाउने अवस्था आउँछ भने त्यस्तो काममा आफ्नो सम्पति किन खर्च नगरौं त भन्ने भावना आयो,’ पाठकले भने। भरतपुरमा आँखा बैंक खुलेपछि आँखा दान गर्न खोज्नेहरु बढेका छन्। अस्पतालबाट प्राप्त जानकारी अनुसार २६५ जनाले आँखा दानका लागि नाम लेखाएका छन्।
आँखा बैंक हेर्ने अस्पतालका सहायक व्यवस्थापक छाया श्रेष्ठ बैंक स्थापनामा सहयोग गरेका पाठक दम्पती नानी दानको अभियानमा पनि सक्रिय छन्। ‘उहाँहरुले आर्थिक सहयोग मात्रै गर्नु भएन नानी दानका लागि चेतना जगाउने काममा पनि जुट्नु भएको छ। उमेर र स्वास्थ्यले साथ नदिए पनि यो काममा उहाँहरु जुट्नु भएको छ,’ सहायक व्यवस्थापक श्रेष्ठले भनिन्।
kantipur
