गोरखा समाचारदाता
नजिकिदै गरेको फागु पुर्णिमा अर्थात होली पर्व सभ्य रुपले मनाउनु पर्ने जिल्लाको सरोकारवालाहरुले बताएका छन् । गोरखा जेसिसले गरेको होली विशेष अन्र्तक्रिया कार्यक्रमका सहभागी सामाजिक क्षेत्रका अगुवाहरुले सौहार्दपूर्ण ढङ्गले पर्व मनाउनु पर्नेमा जोड दिएका हुन् । ‘बाटो हिड्ने मान्छेलाई जथाभावी रङ्ग छ्याप्ने, लोला हान्ने काम बन्द गर्नुपर्छ’ नेपाल रेडक्रस सोइसाटीका जिल्ला सभापती भगवानबाबु मास्केले भने ‘जबरजस्ती गर्ने अधिकार कसैलाई पनि छैन ।’ होली पर्वलाई कसरी सभ्य र मर्यादित रुपमा मनाउन सकिन्छ भन्ने बारेमा छलफल गर्ने उदेश्य भएको कार्यक्रममा बोल्ने अधिकाशं सहभागीहरुले यस पर्वका नाममा देखिएको बिकृति रोक्न पहल गर्नुपर्ने बताएका थिए ।
जेसिस गोरखाका अध्यक्ष राजिब अधिकारीको अध्यक्षता तथा गोरखा नगरपालिकाका प्रमुख राजनराज पन्तको प्रमुख आतिथ्यतामा भएको कार्यक्रमका सहभागीहरुले गलत कार्य गर्नेलाई कारवाहीको दायरामा ल्याउन प्रशासनलाई आग्रह गरेका छन् । सोही क्रममा प्रहरी निरीक्षक कमला नरालले व्यक्तिको इच्छा विपरित होली खेल्न बाध्य पारिए, होलीको अवसरमा मादक पदार्थ खाएर हो हल्ला एवं झै–झगडा गरे, समाजमा खलल पु¥याउने काम भएगरेको पाइएमा प्रहरीले कानून अनुसार कडा कारवाही गर्ने बताइन् । ‘कानून विपरितका काम भए हामी कसैलाई पनि छोड्दैनौं’ उनले भनिन् ‘मर्यादित भएर पर्व मनाउन म सबैलाई आग्रह गर्दछु ।’
कार्यक्रमका प्रमुख अतिथि गोरखा नगरपालिकाका प्रमुख राजनराज पन्तले चाडपर्वहरु नेपालीको पहिचान भएको भन्दै त्यसलाई सभ्य रुपमा मनाउनु पर्ने बताएका छन । ‘होली सभ्य र मर्यादित रुपमा मनाउनु पर्छ’ उनले भने ‘यसलाई बिग्रिन दिनुहुन्न भनेर युवाहरुले जुन चासो दिनुभएको छ यो सरानिय छ ।’ कार्यक्रममा रोटरी क्लव अफ गोरखाका श्याम जोशी, सामुदायिक सेवा केन्द्रका रामहरी केसी, लियो क्लव अफ गोरखाका यम बसेल, मल्टीट्यालेन्ट गुप्रकी सरिता गुरुङ, जेसि अञ्जबाबु खत्री, पत्रकार शिव उप्रेती लगायतले मन्तव्य राखेका थिए ।
यसैविच जिल्ला प्रशासन कार्यालय गोरखाले पनि एक सूचना जारी गर्दै होली पर्व सभ्य र मर्यादित रुपमा मनाउन आग्रह गरेको छ । पर्वका नाममा हुने अवाञ्छित क्रियाकलापलाई प्रशासनले कडा कारवाही गर्ने चेतवानी दिएको छ ।
