गोरखा समाचारदाता
फागुन २९ गते । गोरखाको पालुङटारमा जारी गण्डकी प्रदेश स्तरिय ‘लिगलिग पालुङटार मेयर कप फुटबल प्रतियोगिता’मा नवलपुरको देवचुली नगरपालिका र गोरखाको गण्डकी गाउँपालिका क्वाटर फाईनल प्रबेश गरेको छ ।
मंगलबार भएको दुई खेलबाट देवचुली नगरपालिका नवलपुर र गण्डकी गाउँपालिका गोरखा क्वार्टर फाईनलमा पुगेका हुन् । देवचुलीले तनहुँको शुक्लागण्डकी नगरपालिका लाई २–१ गोल अन्तरले हराउदै क्वाटर फाईनलको यात्रा तय गरेको हो भने स्याङजाको गल्याङ नगरपालिका अनुपस्थित भएपछि गण्डकी गाउँपालिका स्वतः क्वाटर फाईनल प्रबेश गरेको आयोेजक पालुङटार नगरपालिकाले जानकारी दिएको छ ।
निर्णय फेरबदल हुदाँ पुतलीबजार क्वाटर फाईनलमा
सोमबार भएको खेलमा स्याङजाको पुतलीबजार नगरपालिका र लमजुङको बेशी शहर नगरपालिका बिच भएको खेलको निर्णय परिवर्तन भए पछि पुतली बजार क्वाटर फाइनलमा प्रवेश गरेको छ ।
सोमबार भएको खेलमा बेशीशहर विजेता भएको थियो । तर खेलमा नियम विपरीत नगरपालिका भन्दा बाहिरका खेलाडी ल्याएको भन्ने उजुरी परे पछि छानविन गर्दा पुष्टि भएको भन्दै आयोजक अनुशासन समितिले बेशीसहरलाई कारवाही गरी पुतली बजारलाई क्वाटर फाईनल प्रबेश गराएको छ । अब यो खेलबाट वेशीसहर बाहिरीएको छ ।
बुधबार बारपाक/भानु र गोरखा नगरपालिका/कुस्मा भिड्दै
पालुङटारको हवाई ग्राउण्डमा जारी प्रतियोगिता अन्तरर्गत बुधबार दुई खेल हुने भएको छ । पहिलो खेल दिउसो १२ बजे गोरखाको बारपाक सुलिकोट गाउँपालिका र तनहुँको भानु नगरपालिका बिच हुने छ भने दोस्रो खेल दिउसो २ बजे गोरखा नगरपालिका र पर्वतको कुस्मा नगरपालिका बिच हुने छ ।
प्रतियोगितामा प्रथम पुरस्कार नगद पुरस्कार २ लाख ३४ हजार ५ सय ६७ रुपैयाँ, द्धितिय हुने समूहले पुरस्कार नगद १ लाख २३ हजार ४५६ रुपैयाँ पाउने छन । सेमि फाइनलमा पुग्ने २ टिमलाई नगद ५४ हजार ३ सय २१ रुपैयाँ पाउने छन ।
त्यस्तै गरी प्रतियोगितामा उत्कृष्ट खेलाडीले नगद १२ हजार ३ सय ४५ रुपैयाँ, उत्कृष्ट गोलरक्षक, अग्रपक्ति, मध्यपक्ति, रक्षक, गोलकर्ताले पनि जनही ९ हजार ८ सय ७६ रुपैयाँका दरले पुरस्कार पाउने छन् ।
पालुङटार नगरपालिकाको आयोजनामा भएको प्रतियोगितामा गण्डकी प्रदेशका १८ स्थानिय तहको सहभागी रहेको थियो । प्रतियोगिता चैत ६ गते सम्म चल्ने छ ।
