मोहसिन अलि मियाँ/गोरखा
फागुन २९ गते । जिल्लामा घर नबनाउने १९ जना भूकम्पपिडितले अनुदानको रकम फिर्ता गरेका छन् । प्रवलीकरणका समेत गरी ७० हजार ९ सय ८८ लाभग्राही रहेको गोरखामा बिभिन्न कारणले घर नबनाउने १९ भूकम्पपिडितले अनुदान वापत लिएको पहिलो किस्ताको रकम फिर्ता गरेका हुन् । भूकम्पपछि क्षति भएका निजी आवास पुनःनिर्माणका लागि सरकारी अनुदान लिएर घर नबनाउनेहरुले राष्ट्रिय पुनःनिर्माण प्राधिकरणलाई रकम फिर्ता गरेका हुन् ।
जिल्लामा १९ जनाबाट ९ लाख ५० हजार रकम राष्ट्रिय पुर्नःनिर्माण प्राधिकरणको खातामा फिर्ता भएको छ । ‘घर बनाउने र गैरलाभग्राहीले लिएको किस्ता रकम फिर्ता गर्न प्राधिकरणले सार्वजानिक सूचना निकालेको थियो’ जिल्ला आयोजना कार्यान्वयन इकाइका प्रमुख रामशरण आचार्यले भने ‘गोरखामा अहिलेसम्म १९ जनाले किस्ता फिर्ता गरेर भौचर हामीलाई बुझाउनु भएको छ ।’
पुर्नःनिर्माण प्राधिकरणले निजी आवास निर्माणका लागि सम्झौता गरी पहिलो किस्ता रकम लिएर घर निर्माण नगर्नेले गत पुस १५ गते भित्रमा रकम फिर्ता गर्न सकिने सार्वजनिक सूचना जारी गरेको थियो । ‘प्राधिकरणले तोकिएको समयसीमा समाप्त भए पनि घर निर्माण गर्न नसक्नेले अझै पनि रकम फिर्ता गर्न चाहेमा गर्न सकिन्छ’ इकाई प्रमुख आचार्यले भने ‘जसरी हुन्छ वास्तविक भूकम्प लाभग्राहीले कि त घर बनाउनु प¥यो, कि त रकम फिर्ता गर्नुर्पयो ।’
रकम लिने र घर निर्माण नगर्ने जो कसैको मनसाय भए पनि रकम असुल गरिने अभियानमा रहेको उनले बताए । त्यसको लागि पहिलो किस्ता लिएर घर नबनाउने लाभग्राहीबाट रकम फिर्ता गराई नाम लाभग्राहीको सूचीबाट हटाइने र त्यसको प्रभाकारी कार्यान्वयनको लागि अनुगमन प्रक्रिया तीव्र बनाइने उनले जानकारी दिए । रकम फिर्ता गर्ने १९ मध्ये १ जनाको स्वास्थ्य अवस्था नाजुक रहेको र सहयोग गर्ने अन्य कोही नभएपछि लिएको पहिलो किस्ता फिर्ता गरेका थिए । अन्य भने दोहोरो लाभग्राहीमा नाम भएका, अन्यत्र घर भएका तथा स्वेच्छिक घर बनाउनेहरु रहेको इकाईका प्रमुख आचार्यले बताए ।
त्यस्तै जिल्लामा हालसम्म जिल्लामा ४७ हजार ६ सय १ घर पुर्नःनिर्माण सम्पन्न भइसकेका छन् । त्यस्तै ५७ हजार १ सय ७७ ले दोस्रो किस्ता लिइसकेका छन् भने ६४ हजार ४ सय ५५ जनाले पहिलो किस्ता लिएको तथ्यांक इकाईसंग छ । ५ हजार ३ सय १० घर प्रवलिकरण लाभग्राहीमा रहेपनि हालसम्म करिब ४ सयले मात्रै सम्झौता गरि काम अघि बढाएको प्रमुख आचार्यको भनाई छ । तर लाभग्राहीमा नाम छुट भएका भूकम्पपिडितको पछिल्लो पटक पुर्नःसर्वेक्षण भएपनि हालसम्म गुनासो सुनुवाई नहुदा उनिहरु भने अन्योलमा परेका छन् । यता इकाई प्रमुख आचार्य भने जिल्लामा संकलन भएका गुनासोलाई केन्द्रमा पठाइएको र प्राधिकरणले छिट्टै सार्वजानिक गर्ने तयारी गरेको दावी गर्छन् ।
