मोहसिन अलि मियाँ/गोरखा
फागुन २७ गते । गण्डकी प्रदेशका मुख्यमन्त्री पृथ्वीसुब्बा गुरुङले प्रदेशमा कर्मचारी अभावले समयमै बजेट खर्च हुन नसकेको बताएका छन् । आइतबार गोरखामा लिगलिग पालुङ्टार मेयर कप फुटबल प्रतियोगिताको उद्घाटन गर्दै मुख्यमन्त्री गुरुङले संघिय सरकारले प्रदेशलाई समयमै कर्मचारी पठाउन नसक्दा प्रदेशको सबै बजेट खर्च हुन नसक्ने अवस्थामा रहेको बताएका हुन । ‘यो आर्थिक वर्ष आधा सकियो तर अहिलेसम्म १५ प्रतिशत मात्रै बजेट खर्च भएको छ’ उनले भने ‘प्रदेश कार्यालयहरु सबै रित्ता थिए, बल्ल अब ब्यवस्थापन हुदैछ, अब काम अघि बढ्छ ।’
संघले बजेट पठाउन ढिलाई गर्दा समेत बजेट खर्च गर्न समस्या भएको उनको जिकिर छ । प्रदेशले योजना ल्याएपनि बजेट नहुदा अन्योलको अवस्था सृजना भएको बताउदै मुख्यमन्त्री गुरुङले अब बैशाखसम्म ६० प्रतिशत बजेट खर्च हुने दावी गरेका छन् । ‘अहिलेसम्म प्रदेशसंग योजना मात्रै थिए, संघबाट बजेट आउन ढिलाई हुदा सोचे अनुसार काम अघि बढाउन नसकेकै हो’ उनले भने ‘अब बजेट पनि आएको छ, कर्मचारी पनि छन्, अब काम अघि बढ्छ, बैशाखसम्म ६० र यो आर्थिक वर्ष भित्र ८० प्रतिशत खर्च गर्छौ ।’
मुख्यमन्त्री गुरुङले संघिय सरकारले प्रदेशलाई भने अनुसार सहयोग नगरेको समेत बताएका हुन् । ‘संघबाट हामीलाई जति सहयोग हुनुपर्ने थियो त्यो पाउन सकेनौ’ उनले भने ‘संघले जुन तरिकाले काम गरेको छ त्यसले हामीलाई अफ्टेरो बनाएको छ ।’ काठमाण्डौ बसेर प्रदेशका कुना कुनाका भुगोललाई सरकारले बुझ्न नसकेको बताउदै मुख्यमन्त्री गुरुङले अधिकार समेत आफ्नै हातमा लिन खोजेको आरोप लगाएका छन् ।
त्यस्तै प्रदेश भित्र बन्द रहेका एयरपोर्टहरु संचालनमा ल्याउने उनले उद्घोष गरेका छन् । पालुङटार, ढोरपाटन लगायतका हवाई मैदान आगामी दुई बर्षभित्र संचालनमा ल्याएर पर्यटन विकासलाई अघि बढाउन सरकारले काम थालेको उनको भनाई छ । त्यस्तै उनले सडक करिडोरसँगै सरकार आर्थिक करिडोरको विकासमा समेत लागेको बताएका छन् ।
नदीजन्य पदार्थ उत्खननका लागि मापदण्ड बनाउने अधिकार प्रदेश सरकारको रहेको बताउदै उनले त्यसको कार्यान्वयन स्थानीय तहले गर्नुपर्ने बताएका छन् । अवैद्य र अब्यवस्थित कामलाई रोक्न सरकारले तत्कालका लागि नदीजन्य पदार्थ उत्खनन रोकेको उनको भनाई छ ।
फरक प्रशंगमा बोल्दै उनले फुटबल प्रतियोगिताले प्रदेशभरको एकतालाई थप मजबुत बनाउने बताउदै उनले अब खेलकुदलाई पर्यटनसंग जोड्नुपर्ने बताएका छन् । ‘अब खेलकुदलाई पर्यटनसँग जोडेर आर्थिक सम्बृद्धिको बाटोमा अघि बढ्न जरुरी छ’ मुख्यमन्त्री गुरुङले भने ‘यो प्रतियोगिताले प्रदेशभरका नगरपालिकालाई एकतावद्ध बनाएको छ ।’
प्रतियोगिता उद्घाटन कार्यक्रममा पूर्वमन्त्री तथा नेकपाका गण्डकी प्रदेश अध्यक्ष हितराज पाण्डे, प्रदेशसभा सदस्य हरिशरण आचार्य, मनकुमारी गुरुङ, ब्यास नगरपालिकाका प्रमुख बैकुण्ठनाथ न्यौपाने, बेंशिसहर का प्रमुख गुमानसिंह अर्याल, गोरखा नगरपालिकाका प्रमुख राजनराज पन्त, नेकपा पालुङटारका विवश चिन्तन, नेपालल्ी काँग्रेसका विमल ढकाल, नयाँ शक्तिका अशोक देवकोटा, पालुंटार नगरपालिकाका उपप्रमुख पम्फा बसेल लगायतले बोलेको प्रतियोगिता आयोजनाका सदस्य सचिव किरण गिरीले जानकारी दिए ।
पालुङटार नगरपालिकाको आयोजनामा भएको लिगलिग पालुङटार मेयर कप फुटबल प्रतियोगिताको उद्घाटन खेलमा आयोजक पालुङटार ‘बि’ ले जितेको छ । पेनाल्टीमा बाग्लुङ नगरपालिकालाई २–४ गोलअन्तरले पराजित गर्दै पालुङटारले जित सुरुवात गरेको हो । खेलको दुवै हालमा दुवै टिमबाट गोल हुन नसकेपछि खेलको निर्णय पेनाल्टी सुटआउटबाट निर्धारण गरिएको छ । खेलमा बागलुङका टिम क्याप्टेन रमेश थापा म्यान अफ द म्याच घोषित हुन सफल भएका छन् ।
प्रतियोगितामा गण्डकी प्रदेशका १८ स्थानीय तहको सहभागिता रहेको छ । गोरखाका २ गाउँपालिका र २ नगरपालिका सहित अन्य जिल्लाका १३ नगरपालिकाको प्रतियोगितामा सहभागिता रहेको छ । प्रतियोगिताको फाइनल चैत ६ गते हुने बताइएको छ । २ लाख ३४ हजार ५ सय ६७ रुपैयाँ प्रथम पुरस्कार राशीको रहेको उक्त प्रतियोगितामा दोस्रो हुने टिमले नगद १ लाख २३ हजार ४ सय ५६ रुपैयाँ नगद मेडल र प्रमाणपत्र पाउने आयोजकले जानकारी दिएको छ । प्रतियोगिताको सेमिफाइनलमा पुग्ने २ टिमलाई नगद ५४ हजार ३ सय २१ रुपैयाँ सहित नगद मेडल र प्रमाणपत्र प्रदान गरिने सदस्य सचिव गिरीले बताए ।