गोरखा समाचारदाता
दोश्रो फुटबल तथा साँस्कृतिक मेला बिहीबारबाट सुरु भएको छ । गोरखा नगरपालिका ९ को दलभञ्ज्याङ्गमा दोस्रो फुटबल तथा साँस्कृतिक मेला सुरु भएको आयोजक द ओसन क्लवका अध्यक्ष अमित खत्रीले जानकारी दिए । ‘ऐतिहासिक गोरखा गोर्खालीको पहिचान, फुटबल विकास गराउने हाम्रो प्रतिवद्धता’ भन्ने मुल नाराका साथ आयोजना गरिएको मेलामा चौथो भेन्ट्रान्स कप फुटबल प्रतियोगिता, पाँचौ ओसन कप यू–१३ फुटबल प्रतियोगितासंगै बिभिन्न साँस्कृतिक कार्यक्रम हुने आयोजकले बताएको छ ।
भेन्ट्रान्स तर्फ ३५ बर्ष उमेर नाघेका गैह्र व्यवसायिक खेलाडीहरु सहभागी उक्त प्रतियोगिताको दुबै समूह तर्फ १२/१२ समूहले टिम दर्ता गराएका छन् । १३ वर्ष मुनिका बालबालिकाहरुको प्रतियोगिताको विजेताले ११ हजार १ सय ११ उपविजेताले ५ हजार ५ सय ५५ सहित सिल्ड, मेडल र प्रमाणपत्र पाउने खत्रीले बताएका छन् । यसैगरी भेन्ट्रान तर्फको विजेताले खसी, ट्रफि र मेडल प्राप्त गर्नेछन् । मेलामा फुटवल प्रतियोगिता सहित फोटो प्रर्दशनी, नगरस्तरीय अन्तर मा.वि लोक ताथा दोहोरी गीत प्रतियोगिता, खेलकुद समाग्रीको बिक्रिका लागि स्टल, स्थानिय कृषि सामाग्रीहरुको प्रर्दशनी राखिएको छ ।
मेला सम्पन्न गर्न ८ लाख भन्दा बढि लागत लाग्ने अनुमान गरिएको छ । औपचारिक कार्यक्रम गरी प्रतियोगिताको उद्घाटन गरिने तयारी भएनी बिहीबार राष्ट्रिय शोक परेकाले पूर्वनिर्धारित कार्यक्रम स्थगित गरिएको छ । बुधबार भएको हेलिकप्टर दुर्घटनामा परी सस्कृति पर्यटन तथा नागरिक उड्यन मन्त्री रबिन्द्र अधिकारी सहित उच्च पदस्थ अधिकारीहरुको मृत्यु भएकाले उनीहरुको शोकमा औपचारिक कार्यक्रम नभएपछि गोरखा नगरपालिकाका प्रमुख राजनराज पन्तको उपस्थितमा खेल सुरु गरिएको हो । प्रतियोगिताको औपचारिक खेल भने आजबाट हुने आयोजकले बताएको छ ।
