गोरखा समाचारदाता

गोरखा नगरपालिकाले कृषकहरुलाई सहुलियतमा हाते ट्याक्टर उपलब्ध गराएको छ । व्यवसायिक कृषि र यान्त्रिकरणमा जोड दिदै नगर क्षेत्र भित्रका २८ जना कृषक/कृषि समूहलाई उक्त ट्याक्टर उपलब्ध गराइएको हो । ‘अहिलेको समय प्रविधिकको हो । पुरानो प्रविधिले कृषिमा आधुनिकीकरण ल्याउन सक्दैन’ गोरखा नगरपालिकाका प्रमुख राजनराज पन्तले भने ‘हाम्रो कृषि क्षेत्रलाई यान्त्रिक बनाउने हाम्रो लक्ष्य छ ।’

सोही अनुरुप गोरखा नगरपालिकाले कृषि औजार वितरण कार्यक्रमको लागि १० लाख बजेट विनियोजन गरेको थियो । उ क्त कार्यक्रम मार्फत ५४ हजार ९ सय ५० रुपैयाँ पर्ने उक्त ट्याक्टर किसानले २७ हजार ४ सय ७५ रुपैयाँमा पाएका हुन् । ‘निकै खुसी लागेको छ अब त हलो जुवा बोकेर गोरु धपाउँदै हिड्नु परेन’ गोरखा नगरपालिका वडा नम्बर १४ का कृषक राजेश बिक्रम शाहले भने ‘हुन त अहिले सम्म मैले यो चलाएको छैन । यसले समयको सदुपयोग र काम गर्न पनि सजिलो हुन्छ भन्ने सुनेको छु ।’ छिटो हुने भएपछि गोरुले जोतेर खेत गर्न नभ्याएपनि बाँझो बसेको जमिन पनि अब खेति गर्ने उनको योजना छ ।

यस अघि नगरपालिकाले सबै वडा कार्यालय मार्फत किसानहरुलाई अनुदानको ट्याक्टर लिनका लागि आब्हान गरेको थियो । ‘हामीले वडा–वडा मार्फत सबैलाई आब्हान गरेका थियौं, जसलाई आवश्यक थियो उहाँहरुले निवेदन दिनुभयो’ उनले भने ‘निवदेन दिएका सबैले पाउनु भएको छैन ।उहाँ बास्तविक किसान हो कि होइन भनेर हामीले राम्रोसँग अध्ययन गरेर मात्र ट्याक्टर दिएका छौं ।’

यस अघि जिल्ला कृषि बिकास कार्यालय, नगरपालिका र संघ सस्था मार्फत अनुदानमा ट्याक्टर नपाएकाहरुलाई मात्र वितरण गरिएको नगरपालिकाको दाबी छ । ‘म सधै कृषक नै हुँ, अहिले पनि मेरो खेतिपाती गरिरहेको छु’ गोरखा नगरपालिका–११ का तुलसी देवकोटाले भने ‘गोरु नभएर काम गर्न गाह्रो भएको थियो । नगरपालिकाले ट्याक्टर दिन्छ रे भन्ने सुनेर निवेदन दिएको थिएँ । आज पाइयो खुसि लागेको छ ।’

बितरण गरिएका २८ मध्ये ६ ओटा कृषि समुह र २२ जना भने व्यवसायिक कृषकहरु रहेको गोरखा नगरपालिकाले जनाएको छ । ७.५ हर्जपावर क्षमताको रहेको र उक्त ट्याक्टरले प्रतिघण्टा १ रोपनीसम्म जमिन जोत्न सक्ने नगरपालिकाका प्राबिधिक सहायक नविन अधिकारीले जानकारी दिए । ‘यो मिनिटिलर हो ।

१ लिटर पेट्रोलबाट १ घण्टा सम्म यस काम गर्न सक्छ’ उनले भने ‘यो निकै सजिलो र छिटो पनि छ ।’ उक्त ट्याक्टरले १ घण्टामा करिब १ रोपनीसम्म जमिन जोत्न सक्ने उनले बताए । मनकामना मिल मेसीनरी सप्लायर्सलाई ट्याक्टर खरिदको बोलपत्र स्वीकृत गराई प्रति ट्याक्टर ५४ हजार ९ सय ५० रुपैयामा नगरपालिकालाई ट्याक्टर उपलब्ध गराएको हो । उक्त कार्यक्रम लागि गोरखा नगरपालिकाले चालु आर्थिक बर्षका लागि १० लाख रुपैयाँ बिनियोजन गरेको थियो ।

लेखकबाट थप:

• लकडाउन नियम उलंघन गरेपछि सेल्टिक र एबरडीनबीचको खेल स्थगित
• पारिवारीक बनमा ठकुरी
• नेपालमै बन्छ विश्वका ७० देशलाई चाहिने आँखाको लेन्स
• सबै वडामा स्वास्थ्य चौकी बनाउने योजना
• टेष्ट वरियतामा कोहली शिर्ष स्थानमा उग्लिए