मोहसिन अलि मियाँ/गोरखा
फागुन १ गते । वारपाक सुलिकोट गाउँपालिका ४ को भण्डारी गाउँमा ६८ घरधुरी छन् । केहि दिनअघि ४ वटा धाराको भरमा बाँचेको भण्डारी गाउँमा अहिले ६८ वटै घरमा पानी आँउछ । घरघरमा पानी आउन थालेपछि स्थानीयले बल्ल सुखको सास फेर्न थालेका छन् । ‘पहिला चारै बजेदेखि धारामा गाग्री लाइनमा राख्नु प¥थ्यो, पानी कै लागि आफ्नै छिमेकी संग बाझ्नुपर्ने बाध्यता पनि’ स्थानीय बिष्णुमाया गुरुङले भनिन् ‘अहिले घरमै पानी आउन थाल्यो, अब बाध्यता हट्यो ।’
गाउँमा भएको ४ धारामा पनि नियमित पानी नआउने समस्या पनि उस्तै थियो । भएको मुल संरक्षण हुन नसक्दा भण्डारी गाउँवासी उत्तिकै आजित थिए । ‘भएको धारामा पनि २ दिनमा एक पटक पानी आउथ्यो, पानी नआउदा १ घण्टा हिडेर ठलाप खोला जानुपर्थो’ गुरुङले भनिन् ‘कहिले ट्यांकी खोलाले बगाउने, कहिले पाइप जाम हुने, त्यसलाई मसार्दैमा हैरान थियौ ।’
भण्डारीगाउँमा अहिले ६८ घरमै धारामा बनेसंगै पानी झर्न थालेपछि स्थानीयमा खुसीयाली छाएको छ । गुरुङ समुदायको बसोबास रहेको सो गाउँमा स्वाँरा सघन गाउँविकास केन्द्रले घरघरमा खानेपानी पुरयाएको हो । युनिसेफ र फिनल्यण्ड राजदुतावासको ८ लाख ९१ हजार र स्थानीयवासीको २ लाख लागतमा घरैपिच्छे धारा बनेको हो । धारा बनाउन ४ लाख ६२ हजार बराबरको श्रमदान समेत स्थानीयले गरेको स्वाँरा सघनका परियोजना इन्जिनियर चक्र जोशीले बताए ।
खानेपानी आयोजनाको गाउँपालिका अध्यक्ष बिष्णु भट्टले एक कार्यक्रमका बिच समुदायलाई हस्तान्तरण गरेका छन् । उपभोक्ता समितिका अध्यक्ष राम बहादुर गुरुङको अध्यक्षतामा भएको हस्तान्तरण कार्यक्रममा गाउँपालिका उपाध्यक्ष सनमाया गुरुङ, वडाध्यक्ष भिमबहादुर गुरुङ, स्वाँरा सघनकी अध्यक्ष कृष्णकुमारी गुरुङ, दुर्गा बहादुर तामाङ, जानुका पनेरु, अमित गुरुङ लगायतले मन्तब्य राखेका थिए ।
त्यस्तै वारपाक सुलिकोट ७ अमलेको बागेश्वरी आधारभुत विद्यालयको नवनिर्मित भवनको मंगलबार उद्घाटन भएको छ । स्वाँरा सघन गाउँविकास केन्द्रको समन्वय तथा सेभ द चिल्ड्रेनको १ करोड १४ हजारको आर्थिक सहयोगमा निर्माण भएको भवनको एक कार्यक्रमका बिच गाउँपालिका अध्यक्ष विष्णु भट्टले उद्घाटन गरेका हुन् । विद्यालय ब्यवस्थापन समितिका अध्यक्ष सूर्य बहादुर गुरुङको अध्यक्षतामा भएको उद्घाटन कार्यक्रममा वडाध्यक्ष कृष्ण गुरुङ, स्वाँरा सघका कार्यकारी निर्देशक सिताराम श्रेष्ठ लगायतले बोलेका थिए ।
