गोरखा समाचारदाता
बुधबार रातीबाट मौसमा आएको परिर्वतनका कारण जनजिवन प्रभावित भएको छ । सुदूरपश्चिमबाट प्रवेश गरेको पश्चिमी वायुको न्यून चापीय प्रणालीका कारण मुलुकभर वर्षा र हिमपात शुरु भएको छ । त्यसको प्रभाव गोरखा र आसपासमा पनि पूर्ण रुपले परेको छ । धार्चे र चुमनुब्री गाउँपालिकाको उच्च भु–भागमा हिमपात हुनुका साथै तल्लो भेगमा झरी परेको छ । जसले गर्दा चिसो बढाएको छ ।
चिसोले वृद्धवृद्धा बालबालिका, अपाङ्गता भएका, गरिब तथा विपन्न वर्गका मानिसहरु बढि प्रभावित भएका छन् । हिमपात भएका उच्च भू–भागका सर्बसारण घरबाट बाहिर सम्म निस्कन सकेका छैनन् । तल्लो क्षेत्रमा पनि अन्य दिनको तुलनामा बिहिबार मानिसहरुको चलहपहल कम देखिएको छ ।
जम्मुकाश्मिर हुँदै नेपाल प्रवेश गरेको मौसमको यो प्रणालीले पश्चिमबाट पूर्व्तिर प्रभाव पार्दै गएको मौसम पूर्वानुमान महाशाखाले जनाएको छ । शनिबारसम्म मुलुकभर अधिकांश स्थानमा हल्कादेखि मध्यमखालको वर्षा तथा हिमपात र केही स्थानमा भारी वर्षा तथा हिमपात हुने सम्भावना रहेको बताइएको छ ।महाशाखाका मौसमविद् बरुण पौडेल मौसमको यो प्रणालीले पश्चिममा बुधबार दिउँसोदेखि नै प्रभाव पारेको र आज बिहान काठमाडौँसम्म आइपुगेको जानकारी दिँदै उनेले भने,‘अहिले काठमाडौँ पश्चिमतिरका क्षेत्रमा पानी परिहेको छ ।’ यो क्रम पूर्वतिर सरिरहेको र पूर्वतिर पानी पर्ने जानकारी गराउँदै उनले यो अवस्था तीन दिनसम्म कायम रहनसक्ने बताए ।
हिमाली क्षेत्रमा पनि व्यापक हिमपातको सम्भावना देखिएको छ । मौसमको यो प्रणालीले केही जाडो बढाउने देखिन्छ । आकाश खुल्ने र घाम लाग्ने स्थिति नभएकाले दिउँसोको तापक्रम कम भई केही बढी चिसो महसुस हुनेछ । शनिबारसम्म पश्चिममा आकाश केही खुल्ने जानकारी दिँदै उनले काठमाडौँ पूर्वतिर भने शनिबार पनि यसका अवशेष देखिने बताउनुभयो । ‘पूरै देशभरिको आकाश खुल्न भने आइतबारसम्म नै कुनुपछ’, मौसमविद् पौडेलले भने । विभागले मौसमको तीन दिनको पूर्वानुमान गर्दै सूचना सार्वजनिक गरेको छ ।
