भैरहवा समाचारदाता

भैरहवा, माघ २२ गते । प्रदेश ५ सरकारले प्रदेशका सबै निर्वाचन क्षेत्रमा स्मार्ट कृषिगाउँ शुभारम्भको तयारी गरेको छ । प्रदेशको भूमि व्यवस्था कृषि तथा सहकारी मन्त्रालयले स्मार्ट कृषि गाउँ शुभारम्भ गर्न लागेको हो ।
मुख्यमन्त्री तथा मन्त्रिपरिषद्बाट एक निर्वाचन क्षेत्र एक स्मार्ट कृषि गाउँ सञ्चालन कार्यविधि स्वीकृत भएपछि मन्त्रालयले यसको तयारी गरेको हो । प्रदेशका ५२ निर्वाचन क्षेत्रमा एक÷एक स्मार्ट कृषि कार्यक्रम सञ्चालन गर्ने सरकारले यसअघि नै योजना अघि सारेको थियो । सोही अनुसार कार्यविधि स्वीकृत भएको छ ।
पहिलो चरणमा रूपन्देहीको देवदहमा स्मार्ट कृषि गाउँ मुख्यमन्त्रीबाट नै अबको एक सातामा उद्घाटन गर्ने गरी कार्य अगाडि बढाइएको मन्त्रालयले जनाएको छ । भूमि व्यवस्था कृषि तथा सहकारीमन्त्री आरती पौडेलले कार्यविधि मन्त्रिपरिषद्बाट स्वीकृत भएपछि कृषि गाउँ स्थापनाको कार्यलाई अगाडि बढाइएको जानकारी दिनुभयो ।
प्रत्येक स्मार्ट कृषि गाउँलाई ५० लाख रुपियाँ विनियोजन गरी मन्त्रालयले नमुना गाउँ निर्माण गर्ने योजना अगाडि बढाएको थियो । सोही अनुसार स्मार्ट कृषि गाउँमा किसानले गर्ने खेती प्रणालीदेखि लिएर, किसानको उत्पादन, बजारीकरणसम्मको कार्य पूरा गर्ने गरी स्मार्ट कृषि गाउँलाई अगाडि बढाइएको हो । कार्यक्रम सञ्चालनका लागि कृषि तथा भूमि व्यवस्थामन्त्रीको संयोजकत्वमा कार्यक्रम निर्देशक समिति गठन हुने व्यवस्था अनुसार अहिले कार्य अगाडि बढेको छ ।
स्मार्ट कृषि गाउँका लागि ५२ वटै क्षेत्र छनोट कार्य सकिएको छ । अहिले ती गाउँको अवस्थाका बारेमा विस्तृत प्रतिवेदन बनाउने र कुन कुन क्षेत्रमा विकास गर्ने भन्ने विषयमा अध्ययन भइरहेको छ, मन्त्री पौडेलले भन्नुभयो । मन्त्री पौडेलका अनुसार स्मार्ट कृषि गाउँमा नेपाल कृषि अनुसन्धान परिषद् (नार्क) को समेट टिम परिचालन हुनेछ । यस्तै कृषि विश्वविद्यालयमा अध्ययनरत विद्यार्थीको समेत समूहले सामाजिक परिचालनदेखि लिएर त्यहाँको वस्तुस्थितिका बारेमा जानकारी दिनेछ ।
सुरुवाती चरणमा छनोट भएको गाउँको माटो परीक्षणदेखि लिएर, के कस्तो उत्पादन गर्न सकिन्छ भन्ने विषयमा लगानी गरिने मन्त्रालयले जनाएको छ । किसानलाई व्यावसायिक रूपमा उत्पादनतर्फ डो¥याउनका लागि यो अवधारणा अगाडि बढाइएको मन्त्रालयको भनाइ छ ।
भूमि व्यवस्था कृषि तथा सहकारी मन्त्रालय प्रदेश ५ का योजना तथा अनुगमन महाशाखा प्रमुख विनोद घिमिरेले नमुनाका रूपमा शुरुवात गरिएको गाउँबाट अन्य किसानका सिक्ने थलोका रूपमा विकास हुने अपेक्षा गरिएको बताउनुभयो । पहिलो चरणमा फाउन्डेसनको काम हुनेछ, ५२ वटा स्मार्ट कृषि गाउँले एउटा सन्देश पैदा गर्नेछ, उहाँले भन्नुभयो । सोही अनुसार अन्य किसानहरूले समेत सिको गर्न सक्ने उहाँको अपेक्षा छ ।

gorkhapatra