नरेन्द्र ढकाल/गोरखा
माघ ३ गते । चालु आर्थिक वर्ष भित्र बुढीगण्डकी डुबान क्षेत्रका सबै प्रभावितले मुआब्जा पाउने भएका छन् ।
बुढीगण्डकी आयोजना पुर्नवास तथा पुनस्थापना इकाईका प्रमुख कृष्ण कार्कीले दिएको जानकारी अनुसार यस वर्ष प्राप्त भएको करिब १८ अर्ब रुपैयाँले गोरखा र धादिङका सबै प्रभावितलाई रकम वितरण गरिने छ । ‘यो आर्थिक वर्ष भित्र निर्धारण भएका सबैलाई मुआब्जा दिने हाम्रो तयारी छ’ उनले भने ‘रकम अभाव छैन सबैले पैसा पाउनुहुन्छ ।’ चालु वर्षको अहिले सम्म ४ अर्ब रकम वितरण भइसकेको छ ।
गोरखा र धादिङ तर्फका साविकका २७ गाउँबिकास समितिका सर्वसाधारण प्रभावित हुने उक्त आयोजनाले यस अघि दुबै जिल्ला तर्फ गरी १९ अर्ब रुपैयाँ वितरण गरिसकेको छ । ‘यो रकमले जमिनको मुआब्जा दिएर घर गोठको समेत दिन पुग्छ भन्ने हाम्रो अनुमान छ’ उनले भने ‘यही वर्ष धेरैले घर गोठ र वोटविरुवाका मुआब्जा समेत पाउनुहुन्छ ।’
मुआब्जा वितरणको कामलाई तिब्रता दिइए पनि मालपोत र नापी कार्यालयमा प्रयाप्त कर्मचारी नहुँदा समस्या भएको छ । आयोजना कार्यालयले कामलाई तिब्र रुपमा अगाडी बढाएपनि मालपोत र नापीमा हुने काम चापका कारण मुआब्जा विरतरण सोचे जस्तो हुन नसकेको उनले बताए । ‘माल र नापीमा नियमित सेवाग्राहीको घुँइचो हुन्छ ।
साथीहरुलाई दिन भर त्यतै व्यस्त हुनुहुन्छ’ उनले भने ‘साँझ विहान काम गर्दा पनि भ्याउन सकिएको छैन ।’ सरकारले मालपोत र नापीका कर्मचारीका लागि दिने अतिरिक्त सेवा समेत कटौती गरेकाले काममा लगाउन समस्या भएको उनले बताए । ‘मुआब्जा वितरणमै हामी फोकस छौ, गोरखा तर्फ साबिकको धावाको मालमा अन्तिम चरणको काम भइरहेको छ’ उनले भने ‘धादिङमा सल्यानटारको वितरण मुआब्जा वितरण गर्दैछौं ।’ हालसम्म दुई जिल्लामा गरी १९ अर्ब भन्दा बढि मुआब्जा वितरण भइसकेको छ ।’
आरुघाट, आर्खेत, खहरे क्षेत्रको मुआब्जा यसै वर्षभित्र निर्धारण गर्ने गरी काम भईरहेको आयोजना कार्यालयले बताएको छ । विभिन्न चरणमा छलफल गरी मुआब्जा निर्धारणको बारेमा निर्णय भइसकेको उनको दाबी छ । ‘हामीले विभिन्न कोणमा छलफल गरिसकेका छौं’ कार्कीले भने ‘अब मुआब्जा घोषणा हुन मात्र बाँकी छ ।’ आरुघाटको संवेदनशिलता र महत्वलाई ख्याल गरी उचित मुआब्जा वितरण गर्ने उनको भनाई छ ।
मुआब्जा वितरणको काम अन्तिम चरण तर्फ प्रवेश गरेकाले अब पुर्नवास र पुनस्थापनाका लागि समेत काम सुरु गर्ने तयारी भइरकेको छ । ‘पुर्नवासको कुरालाई पनि सँगै लैजाने सरकारको नीति छ’ उनले भने ‘अब हाम्रो ध्यान त्यता तर्फ बढि हुन्छ ।’ यसै वर्ष आयोजनाको ड्याम बनाउँदा बिस्तापित हुने १०० घरधुरीलाई पुर्नवास गराउने योजना रहेको बुढी गण्डकी आयोजनाले जानकारी दिएको छ ।
